പ്രായപൂർത്തിയാകാത്ത പെൺകുട്ടിയെ പീഡിപ്പിച്ചയാൾ പിടിയിൽ

കൊല്ലം: പ്രായപൂർത്തിയാകാത്ത പെൺകുട്ടിയെ വീട്ടിൽ അതിക്രമിച്ച് കയറി ലൈംഗികമായി പീഡിപ്പിച്ച കേസിൽ കിളികൊല്ലൂർ കോയിക്കൽ ശാസ്താനഗർ ബീമാ മൻസിലിൽ മുസ്തലിഫിനെ (20) കിളികൊല്ലൂർ പൊലീസ് പിടികൂടി. പെൺകുട്ടിയുമായി പരിചയം സ്ഥാപിച്ച പ്രതി ഇത് മുതലാക്കി വീട്ടിൽ അതിക്രമിച്ച് കയറി പീഡിപ്പിക്കുകയായിരുന്നു. വിവരം പുറത്തു പറഞ്ഞാൽ പെൺകുട്ടിയെ സ്‌കൂളിൽ പോകാൻ അനുവദിക്കില്ലെന്നും പിതാവിനെ അപായപ്പെടുത്തുമെന്നും ഭീഷണിപ്പെടുത്തി. തുടർച്ചയായുള്ള പീഡനത്തെ തുടർന്ന് പെൺകുട്ടി ഗർഭിണിയായി. പെൺകുട്ടി നൽകിയ പരാതിയുടെ അടിസ്ഥാനത്തിലായിരുന്നു അറസ്റ്റ്. യുവാവിനെ തട്ടിക്കൊണ്ട് പോയി തടവിൽ പാർപ്പിച്ച് കവർച്ച നടത്തിയ കേസിലും ഇയാൾ മുഖ്യ പ്രതിയാണ്. കിളികൊല്ലൂർ പൊലീസ് ഇൻസ്‌പെക്ടർ ഗിരീഷിന്റെ നേതൃത്വത്തിൽ എസ്.ഐമാരായ സുകേഷ്, സായി, സി.പി.ഒമാരായ ഷാജി, ബിജീഷ്, ശ്യാം ശേഖർ എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്.