മാലിന്യപ്പിഴയ്ക്കു മുൻപ് സൗകര്യമൊരുക്കണം

മലയാളികൾ പൊതുവെ വൃത്തിയും വെടിപ്പും കൂടിയ കൂട്ടരാണെന്നാണ് പൊതുസങ്കല്പം. ആവതുണ്ടെങ്കിൽ രണ്ടു നേരം കുളി നിർബന്ധം. പക്ഷേ, ഈ വൃത്തിബോധമൊക്കെ ശരീര ശുചിത്വത്തിന്റെ കാര്യത്തിലേയുള്ളൂ എന്നതാണ് വാസ്തവം. പരിസരശുചിത്വത്തിന്റെ കാര്യം വരുമ്പോൾ,​ ചപ്പും ചവറുമൊക്കെ മതിലിനു പുറത്ത് എന്നതാണ് നയം. ചീഞ്ഞതും നാറുന്നതുമൊക്കെ സൗകര്യമുണ്ടെങ്കിൽ അയൽപക്കക്കാരന്റെ പുരയിടത്തിൽ നിക്ഷേപിക്കും. അതിനു പറ്റുന്നില്ലെങ്കിൽ പൊതിഞ്ഞുകെട്ടി,​ രാത്രിനേരത്ത് സ്കൂട്ടറിൽ രഹസ്യമായി കൊണ്ടുപോയി,​ ഒന്നുമറിയാത്ത മട്ടിൽ വഴിയോരത്ത് തട്ടും!

ഇങ്ങനെ ഭക്ഷണാവശിഷ്ടങ്ങൾ ഉൾപ്പെടെയുള്ള,​ സ്വന്തം വീട്ടിൽ നിന്നുള്ള മാലിന്യം പൊതു ഇടങ്ങളിൽ നിക്ഷേപിക്കുന്നവർക്ക് കനത്ത പിഴ ചുമത്തുന്ന നിയമം കഴിഞ്ഞ ദിവസമാണ് നിലവിൽ വന്നത്. ഇതു സംബന്ധിച്ച നിയമഭേദഗതി ബില്ലിൽ ഗവർണർ ഒപ്പിട്ടതിനു തൊട്ടുപിന്നാലെ,​ തദ്ദേശസ്ഥാപനങ്ങളുടെ സെക്രട്ടറിമാർക്ക് സർക്കാർ നിർദ്ദേശവും നൽകി. മാലിന്യം വലിച്ചെറിയുന്നവർ മാത്രമല്ല,​ വഴിയോരത്ത് കൂട്ടിയിട്ട് കത്തിക്കുന്നവരും,​ കുഴിച്ചുമൂടുന്നവരുമൊക്കെ കുടുങ്ങും! അയ്യായിരം രൂപയാണ് കുറഞ്ഞ പിഴത്തുക. പരമാവധി ശിക്ഷ ഒരുവർഷം വരെ തടവും 50,​000 രൂപ പിഴയും. തദ്ദേശസ്ഥാപന സെക്രട്ടറിയുടെ പിഴ അറിയിപ്പ് നിസ്സാരമായി കരുതി അവഗണിക്കാമെന്നു വിചാരിക്കുന്നവരിൽ നിന്ന്,​ പ്രതിമാസം അമ്പതു ശതമാനം പിഴയോടെ അത് വസ്തുനികുതിയുടെ ഭാഗമായോ കെട്ടിട നികുതിയുടെ ഭാഗമായോ നിർബന്ധമായും ഈടാക്കും.

പൊതുസ്ഥലത്തെ മാലിന്യ നിക്ഷേപത്തിനുള്ള ശിക്ഷ ഇതുകൊണ്ടും തീരില്ല. മാലിന്യശേഖരണത്തിനുള്ള യൂസർഫീ അടയ്ക്കാത്തവർക്ക്,​ അത് അടയ്ക്കുന്നതുവരെ ബന്ധപ്പെട്ട തദ്ദേശസ്ഥാപനത്തിൽ നിന്ന് ഒരുവിധത്തിലുമുള്ള സേവനത്തിന് അർഹതയുണ്ടാകില്ല. ഇനി,​ ഇതുമായി ബന്ധപ്പെട്ട സർക്കാർ നിർദ്ദേശം പാലിക്കാത്ത തദ്ദേശസ്ഥാപനങ്ങളുടെ കാര്യത്തിലോ?​ അവർക്കുള്ള പിഴ സർക്കാർ ഈടാക്കും. ഏതെങ്കിലും വ്യക്തിയോ സംഘമോ സ്ഥാപനമോ പൊതുസ്ഥലത്ത് മാലിന്യം നിക്ഷേപിക്കുന്നത് ശ്രദ്ധയിൽപ്പെടുന്നവർ അക്കാര്യം തദ്ദേശസ്ഥാപന സെക്രട്ടറിയെ രേഖാമൂലം അറിയിച്ചാൽ,​ ഉചിതമായ പാരിതോഷികവും കിട്ടും.

വൃത്തിയുള്ള ഗൃഹപരിസരം മാത്രമല്ല,​ ശുചിത്വമുള്ള പൊതുപരിസരവും ആരോഗ്യപൂർണമായ പൊതുസമൂഹത്തിന്റെ ലക്ഷണമാണ്. വീടും പുരയിടവും വൃത്തിയായി സൂക്ഷിക്കുകയെന്നത് വ്യക്തിയുടെയും കുടുംബത്തിന്റെയും ഉത്തരവാദിത്വമാണെന്നതു പോലെ,​ പൊതുസ്ഥലങ്ങളുടെ ശുചിത്വം ഉറപ്പാക്കുന്നത് സർക്കാരിന്റെ മാത്രമല്ല,​ സമൂഹത്തിന്റെയും കടമയാണ്. ഇതിനായി സ്വീകരിക്കുന്ന ഏതു നടപടിയും സ്വാഗതം ചെയ്യപ്പെടേണ്ടതും,​ നിയമങ്ങൾ അനുസരിക്കാത്തവർക്ക് പിഴ ചുമത്തുന്നതിനെ പിന്തുണയ്ക്കേണ്ടതും തന്നെയാണ്.

വിഷയം അതല്ല. വാഹനങ്ങൾക്ക് പൊതു പാർക്കിംഗ് സൗകര്യം ഏർപ്പെടുത്താതെ,​ വഴിയരികിലെ പാർക്കിംഗിന് പിഴ ചുമത്തുന്ന നടപടിയിൽ മര്യാദയുടെയും നീതിയുടെയും അംശം തീരെയില്ലാത്തതു പോലെ,​ മാലിന്യ സ്വീകരണത്തിനും നിർമ്മാർജ്ജനത്തിനും തദ്ദേശസ്ഥാപനങ്ങൾ മതിയായ സംവിധാനവും സൗകര്യവും ഏർപ്പെടുത്തുന്നിനു മുൻപ്,​ വഴിയോരത്തെ മാലിന്യ നിക്ഷേപത്തിന് കനത്ത പിഴ ചുമത്തുന്നതിനെ എങ്ങനെ നീതികരിക്കുമെന്നതാണ് ജനങ്ങളുടെ ചോദ്യം. വീടുകളിലെയും മറ്റും മാലിന്യം പ്രതിമാസം നിശ്ചിത ഫീസ് ഈടാക്കി ശേഖരിക്കുന്നതിനും അംഗീകൃത കേന്ദ്രങ്ങളിൽ സംസ്കരിക്കുന്നതിനും തദ്ദേശസ്ഥാപനങ്ങൾ ഹരിതകർമ്മ സേന പോലെയുള്ള ഏജൻസികളെ ഏർപ്പാടാക്കിയിട്ടുണ്ടെന്നാണ് വയ്പ്. നഗരമേഖലകളിൽ ഈ സംവിധാനം ഏറക്കുറെ നടപ്പിലായിട്ടുണ്ടെങ്കിലും മറ്റിടങ്ങളിൽ പൂർണ തോതിൽ പ്രവർത്തിക്കുന്നുണ്ടെന്ന് പറയാനാവില്ല.

ഇങ്ങനെ വീടുകളിൽ നിന്ന് ഫീസ് ഈടാക്കി മാലിന്യം ശേഖരിക്കുന്ന ചില സ്വകാര്യ ഏജൻസികൾ ഈ മാലിന്യമെല്ലാം ഒഴിഞ്ഞ പൊതുസ്ഥലങ്ങളിലും,​ തിരക്കു കുറഞ്ഞ റോഡിന്റെ അരികുകളിലും നിക്ഷേപിക്കുന്നതായുള്ള പരാതികൾ വ്യാപകമായുണ്ട്. കോർപ്പറേഷൻ,​ മുനിസിപ്പാലിറ്റി,​ പഞ്ചായത്ത് തലങ്ങളിൽ മാലിന്യ ശേഖരണത്തിനും സംസ്കരണത്തിനും കുറ്റമറ്റ സംവിധാനം ഏർപ്പെടുത്തുകയാണ് ആദ്യം വേണ്ടത്. ഈ സൗകര്യം നൽകിയിട്ടും,​ പ്രതിമാസ യൂസർ ഫീ നൽകാൻ മടിച്ച് പൊതുസ്ഥലം മലിനമാക്കുന്നവർക്ക് കനത്ത പിഴതന്നെ ചുമത്തണം. മാലിന്യനിർമ്മാർജ്ജന കാര്യത്തിന് മതിയായ ഫണ്ട് ലഭ്യമല്ലെന്നാണ് തദ്ദേശസ്ഥാപനങ്ങളുടെ പരാതി. അത്തരം പരാതികളുയരാൻ അവസരം നൽകാതിരിക്കേണ്ടത് സർക്കാരാണ്.