വയസ് ഒന്നര, ലോകറെക്കാഡ് മൂന്ന്
മുഹമ്മ: ലോകമെന്തെന്ന് അറിയാത്ത പ്രായത്തിൽ ലോകറെക്കാഡുകൾ വാരിക്കൂട്ടി അത്ഭുതമാകുകയാണ് ശ്രീകാർത്തി എന്ന ഒന്നരവയസുകാരൻ. രാഷ്ട്രപിതാവായ മഹാത്മാഗാന്ധി മുതൽ ജവഹർലാൽ നെഹ്റു, സരോജിനി നായിഡു, സുഭാഷ് ചന്ദ്രബോസ്, അംബേദ്കർ തുടങ്ങി ഇരുപതോളം നേതാക്കളുടെ പേരുകൾ കേട്ടാലുടൻ അവരുടെ ഫോട്ടോകൾ ശ്രീകാർത്തി തൊട്ടുകാണിക്കും. കൂടാതെ പഴങ്ങൾ, പച്ചക്കറികൾ, പൂക്കൾ, നിറങ്ങൾ എന്നിവയും ഇതുപോലെ തിരിച്ചറിയും. ഇംഗ്ലീഷ് നഴ്സറി ഗാനം പാടും, ഒന്നുമുതൽ പത്തുവരെ ഇംഗ്ലീഷിലും മലയാളത്തിലും എണ്ണും, ബ്രഷ് എടുത്ത് കൊടുത്താൽ പടം വരക്കും, റിംഗ് ടോയ് കൃത്യമായി ക്രമീകരിക്കും. ഈ കഴിവുകൾ കണ്ടറിഞ്ഞ് ഇന്ത്യ ബുക്ക് ഒഫ് റെക്കാഡ്സ്, എ.പി.ജെ അബ്ദുൾ കലാം വേൾഡ് റെക്കാഡ്സ്, എലൈറ്റ് ബുക്ക് ഒഫ് റെക്കാഡ്സ് എന്നിവ ഈ കുരുന്ന് പ്രതിഭയെ തേടിയെത്തി.
മണ്ണഞ്ചേരി പഞ്ചായത്ത് കലവൂർ ഐ.ടി.സി കിഴക്കേ ഗുരുമന്ദിരത്തിന് സമീപം പാതിരപ്പള്ളിവെളി ഓട്ടോറിക്ഷ ഡ്രൈവറായ ഷിജുവിന്റെയും സൂര്യശ്രീയുടെയും മകനാണ് ഈ കൊച്ചുമിടുക്കൻ. അമ്മയാണ് കഴിവുകൾ കണ്ടെത്തി വളരെ കുഞ്ഞിലേ തന്നെ പരിശീലിപ്പിച്ചത്.
മകന്റെ കഴിവുകൾ വീഡിയോയിലാക്കി അധികൃതർക്ക് അയച്ചുകൊടുത്തതും അമ്മ തന്നെ. ഇപ്പോൾ ഒന്നരവയസ് പിന്നിട്ട ശ്രീകാർത്തി, മലയാളം നന്നായി സംസാരിക്കും. ലോക അംഗീകാരം ലഭിച്ചതറിഞ്ഞ് ഗുരുമന്ദിരങ്ങൾ, സ്വയം സഹായ സംഘങ്ങൾ ഉൾപ്പെടെയുള്ളവർ അനുമോദനങ്ങളും പാരിതോഷികങ്ങളും കൊണ്ട് കൊച്ചുമിടുക്കനെ പൊതിയുകയാണ്.