കൊച്ചിയിൽ ഗുണ്ടാസംഘങ്ങൾ  തമ്മിൽ  ഏറ്റുമുട്ടി; കൊലക്കേസ് പ്രതിയെ കുത്തിക്കൊന്നു

കൊച്ചി: എറണാകുളം പള്ളുരുത്തിയിലുണ്ടായ സംഘർഷത്തിൽ ഒരാളെ കുത്തി കൊലപ്പെടുത്തി. ലാൽജു എന്നയാളാണ് കുത്തേറ്റ് മരിച്ചത്. ഗുണ്ടാസംഘങ്ങൾ തമ്മിലാണ് ഏറ്റുമുട്ടൽ നടന്നതെന്നാണ് വിവരം. കച്ചേരിപ്പടി സ്വദേശി ഫാജിസാണ് ഇയാളെ കുത്തിയതെന്നാണ് വിവരം. ഇന്ന് വെെകുന്നേരമാണ് സംഭവം നടന്നത്. 2021ൽ കുമ്പളങ്ങിയിൽ നടന്ന ലാസർ കൊലക്കേസിലെ രണ്ടാം പ്രതിയാണ് കൊല്ലപ്പെട്ട ലാൽജു. ഇയാളുടെ മൃതദേഹം ആശുപത്രിയിലേക്ക് മാറ്റി. പൊലീസ് പ്രതിക്കായി തെരച്ചിൽ തുടങ്ങി. ആക്രമണത്തിൽ പരിക്കേറ്റ മറ്റൊരാൾ ചികിത്സയിലാണ്.