ആഗ്രഹങ്ങള് നിറവേറ്റിക്കൊടുക്കാന് കഴിയുന്നില്ല, പെണ്കുട്ടിയെ കണ്ടെത്തി ഭര്ത്താവിന്റെ രണ്ടാം വിവാഹം നടത്തിക്കൊടുത്ത് ഗായിക
ക്വാലാലംപൂർ: ഭർത്താവിന്റെ രണ്ടാം വിവാഹം നടത്തികൊടുത്ത ഗായികയുടെ വാർത്തകളാണ് ഇപ്പോൾ സോഷ്യൽ മീഡിയയിൽ വെെറലാകുന്നത്. മലേഷ്യൻ ഗായിക അസ്ലിൻ അരിഫിനയാണ് കരിയർ തിരക്കുകൾ കാരണം ഭർത്താവിന്റെ കാര്യങ്ങൾ ശ്രദ്ധിക്കാൻ കഴിയുന്നില്ലെന്ന് പറഞ്ഞ് ഭർത്താവിന് പുതിയ പങ്കാളിയെ കണ്ടെത്തി കൊടുത്തത്.
42കാരിയായ എസ്ലിൻ എന്നറിയപ്പെടുന്ന ഗായിക 2021ലാണ് 47കാരനായ വാൻ മുഹമ്മദ് ഹാഫിസാമിനെ വിവാഹം കഴിക്കുന്നത്. സ്റ്റേജ് ഷോകളും ചാനലുകളുടെ അവതാരകയുമായി തിരക്കേറിയ ജീവിതമാണ് എസ്ലിൻ നയിക്കുന്നത്. ജോലിയുടെ തിരക്ക് കാരണം പലപ്പോഴും വീട്ടിൽ നിന്ന് മാറിനിൽക്കേണ്ടിവരികയും ചെയ്യും. തുടർന്ന് ഭർത്താവ് പലപ്പോഴും ഒറ്റയ്ക്കാവുന്നത് എസ്ലീൻ ശ്രദ്ധിച്ചു. അങ്ങനെയാണ് മറ്റൊരു വിവാഹം കഴിക്കാൻ ഗായിക നിർബന്ധിച്ചത്. 26കാരിയായ ഡോക്ടറെ വധുവായി കണ്ടെത്തിയതും എസ്ലിൻ തന്നെയാണ്. മാർച്ചിലായിരുന്നു ഇവരുടെ വിവാഹമെന്ന് ഗായിക തന്നെ പിന്നീട് വെളിപ്പെടുത്തി.
'എന്റെ തിരക്കേറിയ ജീവിതത്തിനിടയിൽ ഭർത്താവിനെ പരിപാലിക്കാനും അദ്ദേഹത്തിന്റെ ആഗ്രഹങ്ങള് നിറവേറ്റിക്കൊടുക്കാന്നും കഴിയുന്നില്ല. അതുകൊണ്ടാണ് രണ്ടാം വിവാഹത്തിന് മുൻകെെയെടുത്തത്. രണ്ടാം വിവാഹ ശേഷവും ഞാൻ അദ്ദേഹത്തോടൊപ്പം സന്തോഷത്തോടെയാണ് ജീവിക്കുന്നത്. ഞങ്ങൾ മൂന്നു പേരും ഒരേ വീട്ടിലാണ് താമസം', എസ്ലിൻ വ്യക്തമാക്കി. മലേഷ്യയിൽ ബഹുഭാര്യാത്വം നിയമവിധേയമാണ്. പുരുഷന്മാർക്ക് നാല് ഭാര്യമാർ വരെ ഉണ്ടായിരിക്കാം. എന്നാൽ മലേഷ്യയിലെ അമുസ്ലിമുകൾക്ക് ഈ നിയമം ബാധകമല്ല.