ശൈലജയ്ക്കെതിരെ അശ്ലീല പരാമർശം: കേസെടുത്തു
കോഴിക്കോട്: വടകരയിലെ എൽ.ഡി.എഫ് സ്ഥാനാർത്ഥി കെ.കെ.ശൈലജയ്ക്കെതിരെ സമൂഹ മാദ്ധ്യമത്തിലൂടെ അശ്ലീല പരാമർശം നടത്തിയെന്ന പരാതിയിൽ യൂത്ത് കോൺഗ്രസ് പ്രവർത്തകനെതിരെ തൊട്ടിൽപാലം പൊലീസ് കേസെടുത്തു. തൊട്ടിൽപാലം സ്വദേശി മെബിൻ തോമസിനെതിരെയാണ് കേസ്. ഇൻസ്റ്റഗ്രാമിലൂടെ അശ്ലീല പരാമർശം നടത്തിയെന്ന് കാട്ടി ഡി.വൈ.എഫ്.ഐ ചാത്തൻകോട്ട് നട മേഖല സെക്രട്ടറിയാണ് പരാതി നൽകിയത്. കലാപാഹ്വാനം, സ്ത്രീകളെ അധിക്ഷേപിക്കൽ എന്നീ വകുപ്പുകൾ ചുമത്തിയാണ് കേസെടുത്തത്.
ശൈലജയ്ക്കെതിരെ സൈബർ ആക്രമണം നടന്നെങ്കിൽ തെറ്റ്: കെ. സുധാകരൻ
കെ.കെ. ശൈലജയ്ക്കെതിരെ സൈബർ ആക്രമണം നടന്നെങ്കിൽ അത് തെറ്റാണെന്ന് കെ.പി.സി.സി പ്രസിഡന്റ് കെ. സുധാകരൻ പറഞ്ഞു. അത്തരത്തിൽ ഒരു നടപടിയുണ്ടായോ എന്ന കാര്യത്തിൽ വ്യക്തതയില്ലെന്നും അദ്ദേഹം പറഞ്ഞു. വീട്ടിലെത്തിയുള്ള വോട്ട് സി.പി.എം ദുരുപയോഗം ചെയ്യുകയാണ്. കള്ളവോട്ട് ചെയ്യാതിരിക്കാൻ സി.പി.എമ്മിന് ആവില്ല. യു.ഡി.എഫിന് 20 സീറ്റും കിട്ടുമെന്ന സർവേഫലം പുറത്തുവന്നതോടെയാണ് ഈ നീക്കം. സംഭവത്തിൽ യു.ഡി.എഫ് പരാതി നൽകും. ഉദ്യോഗസ്ഥ തലത്തിലും രാഷ്ട്രീയം കളിക്കുന്നുണ്ടെന്നും സുധാകരൻ പറഞ്ഞു.