അവരെക്കുറിച്ചോർത്ത് നാണിക്കുന്നു , അയോദ്ധ്യ നിവാസികളെ കുറ്റപ്പെടുത്തി 'ലക്ഷ്മണൻ'
അയോദ്ധ്യ: രാമക്ഷേത്രം സ്ഥിതി ചെയ്യുന്ന ഉത്തർപ്രദേശിലെ ഫൈസാബാദ് മണ്ഡലത്തിലെ ബി.ജെ.പിയുടെ പരാജയത്തിൽ അയോദ്ധ്യ നിവാസികളെ കുറ്റപ്പെടുത്തി രാമാനന്ദ് സാഗറിന്റെ രാമായണം സീരിയലിൽ ലക്ഷ്മണനായി അഭിനയിച്ച സുനിൽ ലാഹ്റി. രാമക്ഷേത്രം യാഥാർത്ഥ്യമാക്കുന്നതിൽ ബി.ജെ.പിയാണ് മുഖ്യപങ്കുവഹിച്ചതെന്ന് വിചാരിക്കുന്നവരെ നിരാശരാക്കുന്നതാണ് ഫലമെന്ന് സുനിൽ ലാഹ്റി പറഞ്ഞു.
ഇൻസ്റ്റഗ്രാമിൽ പങ്കുവച്ച വീഡിയോയിലാണ് അദ്ദേഹത്തിന്റെ പരാമർശം. ബാഹുബലി സിനിമയിൽ കട്ടപ്പ ബാഹുബലിയെ പിന്നിൽനിന്ന് കുത്തുന്ന ചിത്രവും താരം പങ്കുവച്ചു.വനവാസം കഴിഞ്ഞ് തിരിച്ചെത്തിയ സീതാദേവിയെ സംശയിച്ച അതേ അയോദ്ധ്യാ പൗരന്മാരാണ് ഇവരെന്ന് നാം മറക്കുകയാണ്. ദൈവത്തെപ്പോലും നിഷേധിക്കുന്നവരെ എന്ത് വിളിക്കും? സ്വാർത്ഥർ. അയോദ്ധ്യയിലെ പൗരന്മാർ എപ്പോഴും തങ്ങളുടെ രാജാവിനെ വഞ്ചിച്ചിട്ടുണ്ടെന്നതിന് ചരിത്രം സാക്ഷിയാണ്. അവരെക്കുറിച്ചോർത്ത് നാണിക്കുന്നു.-സുനിൽ ലാഹ്റി കുറിച്ചു.
കങ്കണ റണൗട്ടും അരുൺ ഗോവിലും വിജയിച്ചതിൽ അദ്ദേഹം സന്തോഷം പ്രകടിപ്പിക്കുകയും ചെയ്തു. ലോക്സഭ തിരഞ്ഞെടുപ്പിൽ വലിയ തിരിച്ചടിയാണ് യു.പിയിൽ ബി.ജെ.പിക്കുണ്ടായത്. അയോദ്ധ്യ ഉൾപ്പെടുന്ന ഫൈസാബാദ് മണ്ഡലത്തിൽ ബി.ജെ.പി സ്ഥാനാർത്ഥി ലല്ലുസിംഗ് 54,000 വോട്ടുകൾക്കാണ് സമാജ്വാദി പാർട്ടി സ്ഥാനാർത്ഥിയോട് തോറ്റത്.