ഹൂതി ആക്രമണം: കപ്പലിന് തീപിടിച്ചു

സനാ: ഏദൻ ഉൾക്കടലിൽ ഹൂതി മിസൈൽ ആക്രമണത്തെ തുടർന്ന് ചരക്കു കപ്പലിൽ തീപിടിത്തം. ആളപായമില്ല. തീ നിയന്ത്രണവിധേയമാക്കി. ആന്റീഗ ആൻഡ് ബാർബ്യൂഡയിൽ രജിസ്റ്റർ ചെയ്യപ്പെട്ട കപ്പലാണ് ആക്രമിക്കപ്പെട്ടത്. യെമനിലെ ഏദൻ നഗരത്തിന് തെക്കുകിഴക്കായി 80 നോട്ടിക്കൽ മൈൽ അകലെയായിരുന്നു സംഭവം. ഇസ്രയേൽ - ഹമാസ് യുദ്ധത്തിൽ പാലസ്തീനികൾക്ക് പിന്തുണയറിയിച്ചാണ് മേഖലയിലൂടെ പോകുന്ന കപ്പലുകളെ യെമനിലെ ഹൂതി വിമതർ ആക്രമിക്കുന്നത്. ഇസ്രയേൽ ബന്ധമുള്ള കപ്പലുകളെയാണ് ആക്രമിക്കുന്നതെന്ന് ഹൂതികൾ വാദിക്കുന്നുണ്ടെങ്കിലും മറ്റ് രാജ്യങ്ങളുടെ കപ്പലുകളും ആക്രമിക്കപ്പെടുന്നുണ്ട്.