രണ്ട് വിദ്യാർത്ഥികളെ തെരുവുനായ കടിച്ചു

ഇരിട്ടി: ഇരിട്ടി ഹൈസ്‌കൂൾ എട്ടാം ക്ളാസ് വിദ്യാർത്ഥി വള്ള്യാടെ കശ്യപ് നാരായണൻ, പത്താം ക്ളാസ് വിദ്യർത്ഥി കീഴൂരിലെ അദ്വൈത് പ്രകാശ് എന്നിവരെ തെരുവുനായയുടെ കടിയേറ്റ് കണ്ണൂർ ജില്ലാ ആശുപത്രിയിൽ പ്രവേശിപ്പിച്ചു.ഇന്നലെ വൈകുന്നേരം സ്‌കൂൾ വിട്ട് വീട്ടിലേക്കു പോകുന്നതിനിടെ ഹൈസ്‌കൂൾ ഗേറ്റ് കടന്നു റോഡിലേക്ക് പ്രവേശിച്ച അദ്വൈത് പ്രകാശിന്റെ കാലിൽ തെരുവുനായ കടിക്കുകയായിരുന്നു. ഇവിടെനിന്നും ഓടി മറഞ്ഞ നായ കീഴൂർ വാഴുന്ന വേഴ്സ് യു.പി സ്‌കൂളിന് മുന്നിലെ റോഡിൽ വച്ചാണ് കശ്യപ് നാരായണനെ ആക്രമിച്ചത്. കശ്യപിന് ഇടതു കൈയിലാണ് കടിയേറ്റത്. കുട്ടികളും നാട്ടുകാരും ബഹളം വെച്ചതോടെ നായ ഇവിടെനിന്നും കീഴൂർ അമ്പലം റോഡിലേക്ക് ഓടിപ്പോവുകയായിരുന്നു. നേരംപോക്ക്, ഹൈസ്‌കൂൾ റോഡ്, കീഴൂർ തുടങ്ങിയ സ്ഥലങ്ങളിൽ തെരുവുനായശല്യം രൂക്ഷമായിട്ടുണ്ട്.