വർക്ക്‌ഷോപ്പിന്റെ മേൽക്കൂര പൊളിച്ച് മോഷണം: രണ്ടുപേർ പിടിയിൽ

കിടങ്ങൂർ: വർക്ക്‌ഷോപ്പിന്റെ മേൽക്കൂര പൊളിച്ച് ബാറ്ററികൾ ഉൾപ്പെടെ മോഷ്ടിച്ച രണ്ട് യുവാക്കൾ അറസ്റ്റിൽ. കിടങ്ങൂർ ഇടിഞ്ഞപുഴ മുശാരത്തു അനന്തു (23), കിടങ്ങൂർ പിറയാർ മൂന്നുതോടു കിഴക്കേടത്ത് അർജുൻ (20) എന്നിവരെയാണ് കിടങ്ങൂർ പൊലീസ് അറസ്റ്റ് ചെയ്തത്. കിടങ്ങൂർ ബി.എസ്.എൻ.എൽ ടെലിഫോൺ എക്‌സ്‌ചേഞ്ച് ഓഫീസിന് സമീപത്തുള്ള ഓട്ടോമൊബൈൽ വർക്ക്‌ഷോപ്പിലാണ് സംഭവം. മേൽക്കൂരയിലെ ഷീറ്റ് ഇളക്കിമാറ്റിയ ശേഷം വർക്ക്‌ഷോപ്പിനുള്ളിൽ കടന്ന് വാഹനങ്ങളുടെ 3 ബാറ്ററികളും, ഇരുമ്പ് അടകല്ലും, സ്പാനറുകളും ഉൾപ്പെടെ 11,000 രൂപയുടെ സാധനങ്ങൾ മോഷ്ടിച്ച് കടന്നുകളഞ്ഞു. പരാതിയെ തുടർന്ന് കിടങ്ങൂർ പൊലീസ് കേസെടുത്ത് മോഷ്ടാക്കളെ പിടികൂടി. മോഷണ മുതലുകൾ വില്പന നടത്തിയ കടയിൽ നിന്നും കണ്ടെടുത്തു. അനന്തുവിന് കിടങ്ങൂർ, പാലാ എന്നീ സ്റ്റേഷനുകളിൽ ക്രിമിനൽ കേസുകൾ നിലവിലുണ്ട്. കോടതിയിൽ ഹാജരാക്കിയ ഇരുവരെയും റിമാൻഡ് ചെയ്തു.