വി വി ഐ പികളുമായി മുംബയിൽ പറന്നിറങ്ങിയത് നൂറിലേറെ സ്വകാര്യ വിമാനങ്ങൾ
മുംബയ്: കലാ, കായിക താരങ്ങൾ, വ്യവസായികൾ തുടങ്ങി റിലയൻസ് ഇൻഡസ്ട്രി ചെയർമാൻ മുകേഷ് അംബാനിയുടെ മകൻ അനന്തിന്റെയും രാധിക മർച്ചന്റിന്റെയും വിവാഹത്തിനായി ലോകത്തിന്റെ വിവിധ ഭാഗങ്ങളിലുള്ള പ്രമുഖരാണ് മുംബയിലെത്തിയത്. ഇതോടനുബന്ധിച്ച് മുംബയ് നഗരത്തിലും വലിയ നിയന്ത്രണങ്ങളാണുള്ളത്. ട്രാഫിക് നിയന്ത്രണങ്ങൾ, പുതിയ വാഹനങ്ങൾ, എല്ലാം ഇതിനോടകം ചർച്ചയായി. അതിഥികളെ എത്തിക്കുന്നതിനായി 100 വിമാനങ്ങളാണ് മുകേഷ് അംബാനി വാടകയ്ക്ക് എടുത്തിരിക്കുന്നത്. ഇതിൽ തന്നെ മൂന്ന് ഫാൽക്കൻ 2000 ജെറ്റുകളും ഉൾപ്പെട്ടിട്ടുണ്ടെന്നാണ് റിപ്പോർട്ട്. ഈ മൂന്ന് വിമാനങ്ങൾക്ക് മാത്രം കോടികളാണ് ചെലവ്. വിവിധ രാജ്യങ്ങളിൽ നിന്നും ഇന്ത്യയിലെ ഒട്ടുമിക്ക സംസ്ഥാനങ്ങളിൽ നിന്നും ആളുകൾ എത്തുന്നുണ്ട്. വാടകയ്ക്ക് എടുത്തിട്ടുള്ള വിമാനങ്ങൾ സർവീസുകൾ നടത്തിക്കൊണ്ടേയിരിക്കും.
മുൻ ബ്രിട്ടീഷ് പ്രധാനമന്ത്റിമാരായ ബോറിസ് ജോൺസൺ, ടോണി ബ്ലെയർ, യു.എസ് മുൻ സ്റ്റേറ്റ് സെക്രട്ടറി ഹിലരി ക്ലിന്റൻ, അമേരിക്കൻ ടെലിവിഷൻ താരം കിം കർദാഷിയൻ, നടി പ്രിയങ്ക ചോപ്ര, രജനീകാന്ത്, മൈക്രോസോഫ്റ്റ് സ്ഥാപകൻ ബിൽ ഗേറ്റ്സ്, മെറ്റ സി.ഇ.ഒ മാർക്ക് സക്കർബർഗ്, യു.എസ് മുൻ പ്രസിഡന്റ് ഡൊണാൾഡ് ട്രംപിന്റെ മകൾ ഇവാൻക തുടങ്ങിയ വി.വി.ഐപികളുമായി നൂറിലേറെ സ്വകാര്യ വിമാനങ്ങളാണ് മുംബയിൽ പറന്നിറങ്ങിയത്. സൽമാൻ ഖാൻ മുതൽ യഷ് വരെ ഇന്ത്യൻ സെലിബ്രിറ്റികളുമുണ്ട്.
ജിയോ വേൾഡ് കൺവെൻഷൻ സെന്ററിന് സമീപത്തേക്കുള്ള ഗതാഗതം നിയന്ത്രിച്ചിട്ടുണ്ട്. പല പ്രദേശങ്ങളിലും വഴി തിരിച്ചുവിടും കഴിഞ്ഞ 5ന് ഇത് സംബന്ധിച്ച നിർദ്ദേശം ട്രാഫിക് പൊലീസ് നൽകിയിരുന്നു.