രണ്ടുപേരെ വാഹനമിടിച്ച് കൊലപ്പെടുത്തി; പ്രതി 9 വർഷങ്ങൾക്കുശേഷം പിടിയിൽ

ആറ്റിങ്ങൽ: രണ്ടുപേരെ വാഹനമിടിച്ച് കൊലപ്പെടുത്തിയ കേസിലെ പ്രതി 9 വർഷങ്ങൾക്കുശേഷം പിടിയിൽ.വർക്കല വെട്ടൂർ റാത്തിക്കൽ തൈത്തോട്ടം വീട്ടിൽ അസിമിനെയാണ് (45) ആറ്റിങ്ങൽ പൊലീസ് പിടികൂടിയത്.ദേശീയപാതയിൽ ആറ്റിങ്ങൽ പൂവൻപാറയിൽ വച്ച് ഇയാൾ അമിത വേഗതയിൽ ഓടിച്ചിരുന്ന കാർ ബൈക്കിലും ഓട്ടോറിക്ഷയിലും ഇടിച്ചുകേറുകയായിരുന്നു.അപകടത്തിൽ ബൈക്കിൽ ഓടിച്ചിരുന്ന സുഭാഷ് എന്നയാളും ഓട്ടോയിൽ സഞ്ചരിച്ചിരുന്ന സ്ത്രീയുമാണ് മരിച്ചത്.തുടർന്ന് കാർ നിറുത്താതെ പോയി.

സംഭവത്തിനു ശേഷം ഗൾഫിലേക്ക് മുങ്ങിയ പ്രതി അടുത്തിടെ വെട്ടൂരിൽ നിന്ന് താമസം മാറി കൊല്ലം പാരിപ്പള്ളി പൊലീസ് സ്റ്റേഷൻ അതിർത്തിക്കടുത്ത് താമസിച്ചു വരവെയാണ് പൊലീസ് അറസ്റ്റ് ചെയ്തത്.ആറ്റിങ്ങൽ പൊലീസ് സ്റ്റേഷൻ എസ്.എച്ച്.ഒ ഗോപകുമാർ.ജിയുടെ നേതൃത്വത്തിൽ ആറ്റിങ്ങൽ എസ്.ഐമാരായ സജിത്ത്.എസ്,എ.എസ്.ഐ രാധാകൃഷ്ണൻ, ഉണ്ണിരാജ്,സി.പി.ഒ നിധിൻ എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്.