അജയന്റെ രണ്ടാം മോഷണം കൃതിക്ക് ശബ്ദമായി മമിത ബൈജു

ടൊവിനോ തോമസ് നായകനായി നവാഗതനായ ജിതിൻലാൽ സംവിധാനം ചെയ്യുന്ന അജയന്റെ രണ്ടാം മോഷണം എന്ന ചിത്രത്തിൽ തെന്നിന്ത്യൻ നടി കൃതി ഷെട്ടിക്ക് ശബ്ദം നൽകുന്നത് മമിത ബൈജു. ഇതാദ്യമായാണ് മമിത ബൈജു മറ്റൊരാൾക്ക് ശബ്ദം നൽകുന്നത്.

പാൻ ഇന്ത്യൻ ചിത്രമായി ഒരുങ്ങുന്ന അജയന്റെ രണ്ടാം മോഷണത്തിന്റെ മലയാളം പതിപ്പിലാണ് ശബ്ദം നൽകുന്നത്. ആറ് ഭാഷകളിൽ പുറത്തിറങ്ങുന്ന ചിത്രത്തിൽ ഐശ്വര്യ രാജേഷ്, സുരഭി ലക്ഷ്മി എന്നിവരാണ് മറ്റു നായികമാർ. മൂന്ന് കാലഘട്ടങ്ങളിലൂ‌ടെ കടന്നുപോവുന്ന ചിത്രത്തിൽ ടൊവിനോ തോമസ് ഇതാദ്യമായി ട്രിപ്പിൾ വേഷത്തിൽ എത്തുന്നു.

3 ഡിയിലും 2 ഡിയിലും റിലീസ് ചെയ്യുന്ന ചിത്രത്തിൽ ബേസിൽ ജോസഫ്, ജഗദീഷ്, ഹരീഷ് ഉത്തമൻ, ഹരീഷ് പേരടി, പ്രമോദ് ഷെട്ടി, രോഹിണി തുടങ്ങിയവരാണ് മറ്റു താരങ്ങൾ. സുജിത് നമ്പ്യാരാണ് തിരക്കഥ. ഛായാഗ്രഹണം ജോമോൻ ടി. ജോൺ. എഡിറ്റിംഗ് ഷമീർ മുഹമ്മദ്. ദിബു നൈനാൻ തോമസാണ് സംഗീത സംവിധാനം. മാജിക് ഫ്രെയിംസ്, യു.ജി.എം മോഷൻ പിക്ചേഴ്സ് എന്നീ ബാനറിൽ ലിസ്റ്റിൻ സ്റ്റീഫൻ, ഡോ. സക്കറിയ തോമസ് എന്നിവർ ചേർന്നാണ് നിർമ്മാണം.