കാറിൽ 45 ഗ്രാം എം.ഡി.എം.എയുമായി യുവതിയും യുവാവും പിടിയിൽ

കൊല്ലം: ജില്ലയിൽ വിതരണത്തിനെത്തിച്ച 45 ഗ്രാം എം.ഡി.എം.എയുമായി യുവതിയുൾപ്പെടെ രണ്ടുപേർ പിടിയിൽ. ഇവർ സഞ്ചരിച്ചിരുന്ന താത്കാലിക രജിസ്‌ട്രേഷൻ പതിച്ച കാറും കസ്റ്റഡിയിലെടുത്തു ഇരവിപുരം പുത്തൻ നട നഗർ 197 റെജി ഭവനിൽ റെജി (45), കൊച്ചി വൈപ്പിൻ പെരുമ്പള്ളിയിൽ ആര്യ (26) എന്നിവരാണ് ഡാൻസാഫ് സംഘത്തിന്റെയും വെസ്റ്റ് പൊലീസിന്റെയും പിടിയിലായത്.

ഇന്നലെ രാത്രി 10 നാണ് സംഭവം. ബംഗളുരുവിൽ നിന്ന് വരുകയായിരുന്നു ഇരുവരും. രഹസ്യവിവരത്തിന്റെ അടിസ്ഥാനത്തിൽ ഡാൻസാഫ് സംഘം ഓച്ചിറ മുതൽ കാറിനെ പിന്തുടർന്നിരുന്നു. വെള്ളയിട്ടമ്പലത്തിലെ സ്വകാര്യ ഹോട്ടലിന് മുന്നിൽ വച്ച് പൊലീസ് വാഹനം തടഞ്ഞ് നിറുത്തി പരിശോധിച്ചു. കാറിന്റെ പ്രത്യേക അറയിൽ സൂക്ഷിച്ച നിലയിൽ 45 ഗ്രാം എം.ഡി.എം.എ കണ്ടെത്തി. ഇതിന് വിപണിയിൽ രണ്ട് ലക്ഷം രൂപ വരുമെന്ന് പൊലീസ് അറിയിച്ചു. ഓണക്കാലത്ത് ജില്ലയിൽ വിൽപ്പന നടത്താൻ ലക്ഷ്യമിട്ടെത്തിച്ചതാണ് എം.ഡി.എം.എ എന്നാണ് പ്രാഥമിക വിവരം. ജില്ലയിലെ എൻ.ഡി.പി.എസ് കേസിൽ മുൻപും പ്രതിയായിട്ടുള്ളയാളാണ് പിടിയിലായ റെജി. ഇരുവരെയും വെസ്റ്റ് പൊലീസ് കസ്റ്റഡിയിലെടുത്തു. ഡാൻസിഫ് എസ്.ഐ കണ്ണൻ, വെസ്റ്റ് സ്റ്റേഷൻ ചാർജ് ഷെഫീക്ക് എന്നിവരുടെ നേതൃത്വത്തിലുള്ള സംഘമാണ് ഇരുവരെയും പിടികൂടിയത്. റെജിയെയും ആര്യയെയും ഇന്ന് കോടതിയിൽ ഹാജരാക്കും.