ദേവജിത്ത് നീന്തിക്കയറി, ചരിത്രത്തിലേക്ക്...

വൈക്കം: ഇരു കൈകളും ബന്ധിച്ച് വേന്പനാട്ടുകായലിലെ ചേർത്തല കൂമ്പേൽകടവിലേക്ക് ദേവജിത്ത് ഇറങ്ങുമ്പോൾ സമയം രാവിലെ 8.27. കായലിന്റെ ഏ​റ്റവും വീതിയേറിയ ഒൻപത് കിലോമീ​റ്റർ ദൂരം പിന്നിട്ട് ദേവജിത്ത് നീന്തിക്കയറിയത് റെക്കാഡിലേക്കാണ്. ഒരു മണിക്കൂർ നാൽപത്തിയേഴു മിനി​റ്റ് സമയമെടുത്താണ് അതുല്യനേട്ടം സ്വന്തമാക്കിയത്.ഉദയനാപുരം അമ്പലേഴത്തുവീട്ടിൽ സജീവ് കുമാറിന്റെയും സവിത സജീവിന്റെയും മകനാണ് ദേവജിത്ത്. മൂവാ​റ്റുപുഴയാറിലെ കുത്തൊഴുക്കിൽ കോച്ച് ബിജു തങ്കപ്പന്റെ നേതൃത്വത്തിൽ ആറ് മാസത്തെ നീന്തൽ പരിശീലനത്തിന് ശേഷമാണ് ദേവജിത്ത് നേട്ടം കൈവരിക്കുന്നത്. ചേർത്തല ഗ്രാമപഞ്ചായത്ത് വൈസ് പ്രസിഡന്റ് ഷിൽജ സലിം, ഗ്രാമപഞ്ചായത്തംഗം നൈസി ബെന്നി, തിരുനെല്ലൂർ സർവീസ് കോപ്പറേ​റ്റീവ് ബാങ്ക് പ്രസിഡന്റ് ഡി ബി വിമൽദേവ്, മുൻ പഞ്ചായത്ത് പ്രസിഡന്റ് വി ആർ ഹരിക്കുട്ടൻ എന്നിവർ ചേർന്ന് നീന്തൽ ഫ്ളാഗ് ഓഫ് ചെയ്തു. നീന്തിക്കയറിയ ദേവജിത്തിനെ ചേർത്തല ഫയർ സ്​റ്റേഷൻ ഓഫീസർ പ്രേംനാഥ് പി.വിയുടെ നേതൃത്വത്തിൽ സ്വീകരിച്ചു. വൈക്കം ബീച്ചിൽ നഗരസഭ വൈസ് ചെയർമാൻ പി.ടി സുഭാഷിന്റെ അദ്ധ്യക്ഷതയിൽ ചേർന്ന അനുമോദന സമ്മേളനം ചെയർപേഴ്സൺ പ്രീതാ രാജേഷ് ഉദ്ഘാടനം ചെയ്തു. നഗരസഭ കൗൺസിലർ ബിന്ദു ഷാജി സ്വാഗതം പറഞ്ഞു. സിനി ആർട്ടിസ്​റ്റ് ചെമ്പിൽ അശോകൻ മുഖ്യാതിഥിയായിരുന്നു.

22 കുട്ടികൾക്ക് ആദരം

ചടങ്ങിൽ 22 കുട്ടികളെ വേൾഡ് വൈഡ് ബുക്ക് ഓഫ് റെക്കോർഡ്സിന് പ്രാപ്തരാക്കിയ ഡോൾഫിൻ അക്വാ​റ്റിക് ക്ലബ്ബ് കോച്ച് ബിജു തങ്കപ്പനെയും പ്രോഗ്രാം കോഡിനേ​റ്റർ ഷിഹാബ് കെ സൈനുവിനെയും ആദരിച്ചു.