പേരിലേയുള്ളൂ, അമ്മയ്‌ക്കും കുഞ്ഞിനുമില്ല സംരക്ഷണം

മുണ്ടക്കയം : പേര് മാതൃ - ശിശു വിഭാഗം. പക്ഷേ , മഴ തുടങ്ങിയാൽ കാര്യങ്ങൾ തകിടം മറിയും. ഭിത്തികളിൽ നിന്ന് വെള്ളം ഒലിച്ചിറങ്ങും. ഭീതിയോടെയാണ് ഇവിടെ പലരും ചെലവഴിക്കുന്നത്. ജീവന് യാതൊരു സുരക്ഷയുമില്ല. ഏഴ് ലക്ഷം രൂപ മുടക്കി പുനരുദ്ധാരണം നടത്തിയ മുണ്ടക്കയം കുടുംബാരോഗ്യ കേന്ദ്രത്തിലാണ് ഈ ദുർഗതി. കുട്ടികൾക്ക് കുത്തിവയ്പ് നൽകാനായി പ്രവർത്തിക്കുന്ന കെട്ടിടത്തിന് സമീപം വെള്ളം കെട്ടിക്കിടക്കുകയാണ്. ആശുപത്രിയുടെ പഴയ ഒ.പി പ്രവർത്തിച്ചിരുന്ന കെട്ടിടമാണ് ഇപ്പോൾ മാതൃ ശിശു വിഭാഗത്തിനായി വിട്ടു നൽകിയത്. പഴയ ഓടുകൾ മാറ്റി പുതിയ മേൽക്കൂര സ്ഥാപിച്ചെലും ഭിത്തികൾ ഉൾപ്പെടെ ഈർപ്പം നിറഞ്ഞ നിലയിലാണ്.

കെട്ടിടം അപകടാവസ്ഥയിൽ മതിയായ സൗകര്യങ്ങൾ ഇല്ലാതെയാണ് മേൽക്കൂര നിർമ്മിച്ചിരിക്കുന്നതെന്നാണ് ആക്ഷേപം. മഴയിൽ വെള്ളം ഇറങ്ങിയാൽ കെട്ടിടം കൂടുതൽ അപകടാവസ്ഥയിലാകും. പുതിയ കെട്ടിടം നിർമ്മിച്ചെങ്കിലും ആശുപത്രിയുടെ പ്രവർത്തനം കൂടുതൽ പരിതാപകരണമാണ്. താലൂക്കാശുപത്രിയാക്കി ഉയർത്തണം എന്ന ആവശ്യവും നടപ്പായില്ല.