സിനിമയിൽ അനിയന്റെ പെർഫോമൻസ് എങ്ങനെയുണ്ടെന്ന് ചോദ്യം; ഇതായിരുന്നു ഗോകുൽ സുരേഷിന്റെ മറുപടി

സുരേഷ് ഗോപി, അനുപമ പരമേശ്വരൻ എന്നിവരെ കേന്ദ്ര കഥാപാത്രങ്ങളാക്കി പ്രവീൺ നാരായണൻ തിരക്കഥ എഴുതി സംവിധാനം ചെയ്ത ചിത്രമാണ് 'ജാനകി. വി v/s സ്റ്റേറ്റ് ഒഫ് കേരള ( ജെഎസ്‌കെ)'. ഏറെ നാളത്തെ നി​യ​മ​പോ​രാ​ട്ട​ങ്ങ​ൾ​ക്കൊടുവിൽ​ ചിത്രം ഇന്ന് തീയേറ്ററുകളിലെത്തിയിരിക്കുകയാണ്.

സുരേഷ് ഗോപിയ്‌ക്കൊപ്പം മകൻ മാധവ് സുരേഷും ചിത്രത്തിൽ വേഷമിട്ടിട്ടുണ്ട്. സിനിമ കാണാൻ സുരേഷ് ഗോപിയും മകനും നടനുമായ ഗോകുൽ സുരേഷും തീയേറ്ററിലെത്തിയിരുന്നു. സഹോദരന്റെ അഭിനയം എങ്ങനെയുണ്ടെന്ന് ചില യൂട്യൂബേഴ്‌സ് ഗോകുൽ സുരേഷിനോട് ചോദിച്ചിരുന്നു. പാപ്പരാസികൾക്ക് താൻ മറുപടി നൽകില്ലെന്നാണ് ഗോകുൽ പ്രതികരിച്ചത്.

ഗോകുലിന്റെ വാക്കുകൾ

'ഞാൻ പാപ്പരാസികൾക്ക് മറുപടി കൊടുക്കാറില്ല. ടാഗ് ഉള്ള മീഡിയയ്ക്ക് ഞാൻ മറുപടി കൊടുക്കാം. പാപ്പരാസിക്ക് ഞാൻ കൊടുക്കില്ല. നിങ്ങൾ കണ്ടന്റ് വളച്ചൊടിക്കുന്ന ടീമാണ്. നിങ്ങളല്ല, നിങ്ങൾ നിങ്ങളുടെ കണ്ടന്റ് മീഡിയക്കാർക്ക് വിൽക്കുമല്ലോ. അവർ അതിനെ വളച്ചൊടിക്കും. പത്ത് ഹെഡ്ഡിംഗ് ഇടും. എനിക്കറിയാം നിങ്ങളെ'- ഗോകുൽ സുരേഷ് പറഞ്ഞു.

'ജാനകി v/s സ്റ്റേറ്റ് ഒഫ് കേരള' എന്ന്‌ പേരിട്ടിരുന്ന ചിത്രത്തിന്റെ റിലീസ് കഴിഞ്ഞ മാസമായിരുന്നു നിശ്ചയിച്ചിരുന്നത്. എന്നാൽ സിനിമയുടെ പേരിനെച്ചൊല്ലി സെൻസർ ബോർഡ് പ്രദർശനാനുമതി നിഷേധിച്ചു. ഒടുവിൽ ചിത്രത്തിന്റെ പേര് 'ജാനകി. വി v/s സ്റ്റേറ്റ് ഒഫ് കേരള' എന്നാക്കി. എട്ട് മാറ്റങ്ങളോടെയാണ് സെൻസർ ബോർഡ് പ്രദർശനാനുമതി നൽകിയിരിക്കുന്നത്.