വെറ്ററിനറി സർവകലാശാലയിലേക്ക് എസ്.എഫ്.ഐ മാർച്ച് നടത്തി 

വൈത്തിരി: വയനാട് പൂക്കോട് വെറ്ററിനറി സർവകലാശാല ആസ്ഥാനത്തേക്ക് സർവകലാശാലയിലെ വിദ്യാർത്ഥി വിരുദ്ധ നയങ്ങൾക്കെതിരെ പ്രതിഷേധിച്ച് എസ്.എഫ്‌.ഐയുടെ നേതൃത്വത്തിൽ മാർച്ചും ധർണയും നടത്തി. വെട്ടിച്ചുരുക്കിയ പിജി, പിഎച്ച്ഡി അലവൻസുകൾ വർധിപ്പിക്കുക, തടഞ്ഞുവച്ച ഇന്റേൺഷിപ്പ് അലവൻസ് അനുവദിക്കുക, സർവകലാശാല യൂണിയൻ പ്രവർത്തനത്തിലെ ചട്ടവിരുദ്ധ ഇടപെടൽ അവസാനിപ്പിക്കുക, കോളേജുകളിലെ അദ്ധ്യാപകക്ഷാമം പരിഹരിക്കുക തുടങ്ങി മുപ്പതിലധികം ആവശ്യങ്ങൾ ഉയർത്തി 'എവേക്ക് വാഴ്സിറ്റി' എന്ന പേരിലാണ് മാർച്ച് നടത്തിയത്. സർവകലാശാലയ്ക്ക് കീഴിലിലെ വിവിധ കോളേജുകളിൽനിന്നുള്ള നൂറുകണക്കിന് വിദ്യാർത്ഥികൾ പ്രതിഷേധത്തിൽ അണിനിരന്നു. എസ്.എഫ്‌.ഐ വയനാട് ജില്ല പ്രസിഡന്റ് എം.എസ് ആദർശ് ഉദ്ഘാടനം ചെയ്തു. വെറ്ററിനറി സി.ഡി.എസ്.ടി യൂണിറ്റ് പ്രസിഡന്റ് എസ്. സുജന അദ്ധ്യക്ഷയായി. സംസ്ഥാന കമ്മിറ്റി അംഗം അപർണ ഗൗരി, അക്കാദമി കൗൺസിൽ അംഗം ഡോ. ആർ.പി ശരത്, മാനേജ്‌മെന്റ് കൗൺസിൽ അംഗം കെ.സി വിപിൻ, അഥീന ഫ്രാൻസിസ്, ഇ.എ സായന്ത്, മുഹമ്മദ് ഷിബിലി, ഹരികൃഷ്ണൻ, കൃഷ്ണഭട്ട്, മുഹമ്മദ് ഫൈസി എന്നിവർ പ്രസംഗിച്ചു.