അയിലം -പൊയ്കമുക്ക് റോഡുവഴി ബസ് സർവീസ് വേണം

മുടപുരം: മുദാക്കൽ പഞ്ചായത്തിലെ അയിലം - കാറ്റാടിപൊയ്ക - പൊയ്കമുക്ക് റോഡ് വഴി കെ.എസ്.ആർ.ടി.സി ബസ് സർവീസുകൾ ആരംഭിക്കണമെന്ന നാട്ടുകാരുടെ ആവശ്യം ശക്തമാകുന്നു. അയിലം ജംഗ്ഷനിൽ നിന്ന് നഗരൂർ പോകുന്ന റോഡിൽ കോടിക്കണക്കിന് രൂപ ചെലവഴിച്ച് അയിലം പാലം നിർമിച്ചപ്പോൾ ഈ റോഡുവഴി ബസ് സർവീസുകൾ ആരംഭിക്കുമെന്നും നാട്ടുകാരുടെ യാത്രാക്ലേശത്തിന് ശമനമുണ്ടാകുമെന്നും നാട്ടുകാർ പ്രതീക്ഷിച്ചിരുന്നു. എന്നാൽ അതുണ്ടായില്ല. എൻ.രാജൻ എം.എൽ.എ ആയിരിക്കുമ്പോഴാണ് പാലം നിർമ്മാണം ആരംഭിച്ചത്. നിലവിലെ എം.എൽ.എ വി.ശശിയുടെ ശ്രമഫലമായി 7 വർഷം മുമ്പ് 2019ൽ പാലം പണിപൂർത്തിയാക്കുകയും ഗതാഗതത്തിനു തുറന്നു കൊടുക്കുകയും ചെയ്തു. നാട്ടുകാരുടെ ദീർഘനാളത്തെ ആവശ്യമായിരുന്നു ഇവിടെ പാലം നിർമ്മിക്കണമെന്നത്. പാലം വന്നെങ്കിലും ബസ് സർവീസ് ഇല്ലാത്തത് നാട്ടുകാരെ നിരാശരാക്കി.

പാലം പണിതത്..... 2019ൽ

 കാൽനട ശരണം

നിലവിൽ നാട്ടുകാർക്ക് ബസ്‌യാത്ര ചെയ്യണമെങ്കിൽ അയിലം ജംഗ്ഷനിലെത്താൻ നടന്നോ ഒാട്ടയിലോ പോകണം. അല്ലെങ്കിൽ കൊടുവഴന്നൂരിൽ പോകണം. ഇത്തരത്തിൽ അയിലത്തു ചെന്ന് കിളിമാനൂർ പോകാൻ 23 കിലോമീറ്റർ യാത്ര ചെയ്യണം. എന്നാൽ അയിലം പാലം വഴി ബസ്സ് വന്നാൽ 8 കിലോമീറ്റർ യാത്രമതി. നേരത്തേ ഇതുവഴി ഒരു കെ.എസ്.ആ.ടി.സി ബസ്സ് സർവീസ് ഉണ്ടായിരുന്നെങ്കിലും കൊവിഡ് സമയത്ത് നിറുത്തലാക്കിയിരുന്നു.

 സർവീസ് വേണം

സ്വകാര്യ ബസ്സുകൾക്ക് ഇതുവഴി സർവീസില്ല. ഇളമ്പ ഗവ .ഹയർ സെക്കൻഡറി സ്കൂൾ സ്ഥിതി ചെയ്യുന്നത് ഈ റോഡരികിലാണ്. ഈവഴി ബസ് സർവീസില്ലാത്തതിനാൽ വിദ്യാർത്ഥികളും ജീവനക്കാരും ഒരുപോലെ ബുദ്ധിമുട്ടുന്നുണ്ട്. കിളിമാനൂർ,​ ആറ്റിങ്ങൽ ഡിപ്പോകളിൽ നിന്നായി ബസ് സർവീസ് ആരംഭിക്കണമെന്നാണ് പൊതുവായ ആവശ്യം.

ആവശ്യങ്ങൾ ഇങ്ങനെ

രാവിലെ 6.50 ന് കിളിമാനൂർ ഡിപ്പോയിൽ നിന്ന് ആരംഭിച്ച് ഇളമ്പ ഹയർസെക്കൻഡറി സ്കൂൾ,അയിലം പാലം, വാളക്കാട്, ഊരുപൊയ്ക,ചെമ്പകമംഗലം,മെഡിക്കൽ കോളേജ് വഴി തിരുവനന്തപുരം.

രാവിലെ 8.50ന് ആറ്റിങ്ങൽ നിന്ന് അയിലം,ഇളമ്പ ഹയർ സെക്കൻഡറി സ്കൂൾ, വാളക്കാട്,വലിയകുന്ന് വഴി ആറ്റിങ്ങൽ.

വൈകിട്ട് 3.30ന് തിരുവനന്തപുരത്തു നിന്നു ആരംഭിച്ച് 4.30ന് സ്കൂളിന് മുന്നിൽ എത്തുന്ന സർവീസ്.

ഇത്തരത്തിൽ മൂന്ന് സർവീസ് ആരംഭക്കണമെന്നാണ് ആവശ്യം. ഈ ആവശ്യങ്ങൾ ഉന്നയിച്ച് നാട്ടുകാരും ഹയർസെക്കൻഡറി സ്കൂൾ അധികൃതരും എം.എൽ.എ ഉൾപ്പെടെയുള്ളവർക്ക് നിവേദനം നൽകി.