മോട്ടോർ വാഹന വകുപ്പ് ഓഫീസിൽ ആക്രമണം: അസി.വെഹിക്കിൾ ഇൻസ്പെക്ടറെ ആക്രമിച്ച ഏജന്റ് പിടിയിൽ 

തിരുവല്ല : മോട്ടോർ വാഹന വകുപ്പ് ഓഫീസിൽ അതിക്രമിച്ചു കയറി അസി.മോട്ടോർ വെഹിക്കിൾ ഇൻസ്പെക്ടറെ ആക്രമിച്ച് പരിക്കേൽപ്പിച്ച ഈരാറ്റുപേട്ട സ്വദേശിയായ ഏജന്റ് പിടിയിലായി. ഈരാറ്റുപേട്ട ആർ.ടി ഓഫീസിലെ ഏജന്റായ പട്ടൂർ പറമ്പിൽ വീട്ടിൽ മാഹിൻ (31) ആണ് അറസ്റ്റിലായത്. തിരുവല്ല റവന്യൂ ടവറിൽ പ്രവർത്തിക്കുന്ന പത്തനംതിട്ട എൻഫോഴ്സ്മെന്റ് ആർ.ടി ഓഫീസിലെ അസി. മോട്ടോർ വെഹിക്കിൾ ഇൻസ്പെക്ടർ ആർ.സന്ദീപിനാണ് പരിക്കേറ്റത്. ഇന്നലെ ഉച്ചയ്ക്കു 2.30നായിരുന്നു സംഭവം. വാഹനത്തിൻറെ പിഴത്തുക കുറയ്ക്കണമെന്ന് ആവശ്യപ്പെട്ട് ഓഫീസിൽ എത്തിയ മാഹിനോട് ഓഫീസ് സമയം കഴിഞ്ഞതായി മർദ്ദനമേറ്റ ഉദ്യോഗസ്ഥൻ അറിയിച്ചു. ഇതോടെ പ്രകോപിതനായ മാഹിൻ വനിതാ ജീവനക്കാർ ഉൾപ്പെടെ ഉള്ളവരെ അസഭ്യം പറഞ്ഞശേഷം കയ്യിൽ കരുതിയിരുന്ന താക്കോൽക്കൂട്ടം ഉപയോഗിച്ച് സന്ദീപിനെ ആക്രമിക്കുകയായിരുന്നു. ഇതേതുടർന്ന് ഓഫീസിലെ മറ്റുദ്യോഗസ്ഥരും ബഹളം കേട്ട് ഓടിയെത്തിയ സമീപ ഓഫീസുകളിലെ ജീവനക്കാരും ചേർന്ന് മാഹിനെ കീഴ്പ്പെടുത്തി തിരുവല്ല പൊലീസിന് കൈമാറുകയായിരുന്നു. തിരുവല്ല താലൂക്ക് ആശുപത്രിയിൽ പ്രവേശിപ്പിച്ച സന്ദീപിന്റെ നെറ്റിക്ക് പരിക്കേറ്റു. പ്രതിയെ പിന്നീട് കോടതി ഹാജരാക്കുമെന്ന് പൊലീസ് പറഞ്ഞു.