ബി ആർ അംബേദ്‌കർ; സമത്വത്തിന്റെയും നീതിയുടെയും ദീപസ്തംഭം
ഇന്ത്യൻ ചരിത്രത്തിലൂടെ കടന്നു പോകുമ്പോൾ, മനസിൽ മായാത്ത മുദ്ര പതിപ്പിച്ച നിരവധി പ്രതിഭകളുണ്ട്. അതിലൊരു മഹത്തായ വ്യക്തിത്വമാണ് ബാബാസാഹേബ് എന്നറിയപ്പെടുന്ന ഡോ. ഭീംറാവു രാംജി അംബേദ്‌കർ.
നീതിയും സമത്വവും നിറഞ്ഞ ദർശനം
ഇന്ത്യൻ ഭരണഘടനയുടെ മുഖ്യ ശില്പിയായ അംബേദ്‌കർ, സമൂഹത്തെ ന്യായപരവും സമത്വപരവുമായ ദിശയിലേക്കുനയിക്കാൻ ശ്രമിച്ചു. തൊട്ടുകൂടായ്മയെ ഇല്ലാതാക്കാനും സാമൂഹിക നീതി ഉറപ്പാക്കാനുമുള്ള അദ്ദേഹത്തിന്റെ പ്രവൃത്തികൾ ഇന്ത്യയുടെ മനസിനെ സ്വാധീനിക്കുകയും നയിക്കുകയും ചെയ്തു.
ജീവിതം തന്നെ ഒരു പോരാട്ടം
താഴ്ന്ന ജാതിയിൽ ജനിച്ച അംബേദ്‌കർക്ക് ജാതിവിവേചനത്തിന്റെ കഠിനമായ യാഥാർത്ഥ്യങ്ങളുമായി നേരിട്ട് പോരാടേണ്ടി വന്നിട്ടുണ്ട്. ഈ പോരാട്ടമാണ് അദ്ദേഹത്തെ ഇന്ത്യയുടെ ഏറ്റവും സ്വാധീനമുള്ള സാമൂഹിക രാഷ്ട്രീയ ശില്പികളിലൊരാളായി ഉയർത്തിയെടുക്കാൻ സഹായിച്ചത്. അദ്ദേഹത്തിന്റെ ജീവിതം പ്രതിസന്ധികൾക്കുമേൽ ജയം നേടാനുള്ള മനുഷ്യമനസിന്റെ ശക്തിയുടെ തെളിവായിരുന്നു.
ജനാധിപത്യത്തിന്റെ അടിത്തറ
അംബേദ്‌കറുടെ ദീർഘവീക്ഷണത്തിന് വ്യക്തമായ ഉദാഹരണമാണ് ഇന്ത്യൻ ഭരണഘടന. വൈവിധ്യമാർന്ന സാംസ്‌കാരിക, ഭാഷാ, സാമൂഹിക,സാമ്പത്തിക ഘടനകളെ അംഗീകരിച്ച് ഉൾക്കൊള്ളുന്ന ഭരണഘടന ഇന്ത്യൻ ജനതയുടെ അവകാശങ്ങളെയും കർത്തവ്യങ്ങളെയും സംരക്ഷിക്കുന്ന ഒരു ഉരുക്കു മതിലാണ്.
വിദ്യാഭ്യാസം: ശാക്തീകരണത്തിനുള്ള കരുത്ത്
വിദ്യാഭ്യാസം ഒരു വ്യക്തിയുടെ മാത്രമല്ല, സമുദായത്തിന്റെ സാമൂഹിക–ആഗോള മുന്നേറ്റത്തിനുള്ള ശക്തിയാണ്. വിവേചനവും ദുരിതവും നേരിട്ട സാമൂഹികവിഭാഗങ്ങളിൽ നിന്ന് ആയിരക്കണക്കിന് യുവാക്കൾ വിദ്യാഭ്യാസത്തിലൂടെ ഉയർന്നുവുന്നത് അംബേദ്‌കറുടെ ദർശനത്തിന്റെ വിജയസാക്ഷികളാണ്.
ആഗോള പ്രചോദനം
ഇന്നത്തെ ലോകം അസമത്വത്തെയും മനുഷ്യാവകാശ ലംഘനങ്ങളെയും നേരിടുമ്പോൾ, അംബേദ്‌കറുടെ ആശയങ്ങൾ അതീവ പ്രസക്തിയാർജ്ജിക്കുന്നു. സാമൂഹിക നീതി, ജനാധിപത്യ സംരക്ഷണം, മാനുഷികത തുടങ്ങിയതിലേക്കുള്ള അദ്ദേഹത്തിന്റെ ദർശനങ്ങൾ , ദേശാതീതമായി ചർച്ചചെയ്യപ്പെടുന്നു. ഡോ. ബി.ആർ. അംബേദ്‌കറുടെ ജീവിതവും ദർശനവും പ്രതിരോധശേഷിയുടെയും മനസിന്റെ ദൃഢതയുടെയും ഉജ്ജ്വല ഉദാഹരണമാണ്.
ശ്രീജിത്ത് ശ്രീകുമാർ, (എഴുത്തുകാരനും ചലച്ചിത്ര പ്രവർത്തകനുമായ ഇദ്ദേഹം ചെങ്ങന്നൂർ സ്വദേശിയാണ്).