പരസ്യ മദ്യപാനം ചോദ്യം ചെയ്ത ഡി.വൈ.എഫ്.ഐ നേതാവിന് മർദ്ദനം

കൊല്ലം: ഇരവിപുരത്ത് പൊതു സ്ഥലത്തിരുന്ന് മദ്യപിക്കുന്നവരെ ചോദ്യം ചെയ്ത ഡി.വൈ.എഫ്.ഐ നേതാവിന് മർദ്ദനം. ഡി.വൈ.എഫ്.ഐ ഇരവിപുരം മേഖല കമ്മിറ്റി അംഗവും സി.പി.എം ആൽത്തറ മൂട് ബ്രാഞ്ച് കമ്മിറ്റി അംഗവുമായ തെക്കേവിള പെരുമ്പള്ളിതൊടി വീട്ടിൽ ബി. ബിനുവിനെയാണ് അക്രമിസംഘം പരിക്കേൽപ്പിച്ചത്. ഞായറാഴ്ച വൈകിട്ട് 7 മണിയോടെ കമ്പിയിട്ടഴികം ഓടപ്പുറത്തു റോഡിൽ യാത്രാതടസം ഉണ്ടാക്കുംവിധം മദ്യപിക്കുന്നത് ചോദ്യം ചെയ്തതാണ് അക്രമത്തിൽ കലാശിച്ചത്. തലയ്ക്കും കഴുത്തിനും ഗുരുതരമായി മുറിവേറ്റ ബിനു പാലത്തറ സഹകരണ ആശുപത്രിയിൽ ചികിത്സ തേടി. ഇരവിപുരം പൊലീസ് കേസെടുത്തു.