ചിതൽ ശല്യമുണ്ടോ, സിമ്പിളായി തുരത്താം; ഉപ്പുകൊണ്ടൊരു സൂത്രമുണ്ട്

പല വീടുകളിലും പ്രത്യേകിച്ച് മരം കൊണ്ടുള്ള ഫർണിച്ചറുകളിൽ ചിതൽ ശല്യം രൂക്ഷമാണ്. എന്തിനേറെപ്പറയുന്നു അലമാരകളിലും വാതിലുകളിലും ചുമരിലുമൊക്കെ ചിതൽപ്പുറ്റ് കാണാറുണ്ട്. ഒരിക്കൽ ചിതൽ വന്നാൽ പിന്നെ അതിനെ തുരത്താൻ കുറച്ച് പാടാണ്. ഇത് വീടിനൊരു അഭംഗി തന്നെയാണ്.

ചിതലിന്റെ സാന്നിദ്ധ്യം തിരിച്ചറിഞ്ഞാൽ ഉടനെ തന്നെ അതിനെ ഉന്മൂലനം ചെയ്യണം. അല്ലാത്തപക്ഷം അത് കൂടുതൽ ഇടങ്ങളിലേക്ക് വ്യാപിക്കും. ചിതലിനെ തുരത്താൻ ചില സൂത്രങ്ങളുണ്ട്. ഉപ്പുവെള്ളമാണ് ഏറ്റവും നല്ലൊരു പോംവഴി. ഭിത്തിയിൽ ചെറിയ രീതിയിൽ ചിതൽപ്പുറ്റുണ്ട് എന്ന് കണ്ടാൽ ഉപ്പ് വെള്ളത്തിൽ കലർത്തി, നന്നായി യോജിപ്പിക്കുക. ശേഷം സ്‌പ്രേ കുപ്പിയിൽ നിറച്ച്, ചിതലിന്റെ സാന്നിദ്ധ്യമുള്ളയിടങ്ങളിൽ തളിക്കുക. ഇത് ചിതലിന്റെ സാന്നിദ്ധ്യം കുറയ്‌ക്കാൻ സഹായിക്കും.

വിനാഗിരി ലായനി

അരക്കുപ്പി വെള്ളത്തിൽ 2 - 3 ടേബിൾസ്പൂൺ വിനാഗിരി കലർത്തി ചിതൽപ്പുറ്റിൽ തളിക്കുക. ഇത് ചിതലിനെ കൊല്ലാൻ സഹായിക്കും. ചിതലിനെ തുരത്താനുള്ള ലായനികൾ ഉപയോഗിക്കാം, പക്ഷേ അത് സുരക്ഷിതമാണെന്ന് ഉറപ്പുവരുത്തണം. വേപ്പെണ്ണ

വേപ്പെണ്ണയാണ് മറ്റൊരു പോംവഴി. വേപ്പിന്റെ രൂക്ഷഗന്ധം ചിതലിന് സഹിക്കാൻ കഴിയില്ല. രണ്ട് ടേബിൾ സ്പൂൺ വേപ്പെണ്ണ വെള്ളത്തിൽ കലർത്തി, ഒരു സ്‌പ്രേ ബോട്ടിലിൽ നിറയ്ക്കുക. ശേഷം ചിതലുള്ളയിടങ്ങളിൽ തളിച്ചുകൊടുക്കാം. ഒരിക്കൽ ചിതൽ വന്ന സ്ഥലത്ത് കുറച്ച് ദിവസം തുടർച്ചയായി ഇങ്ങനെ ചെയ്യണം. എങ്കിൽ മാത്രമേ ചിതലിന്റെ ശല്യം പൂർണമായും മാറുകയുള്ളൂ.