ഒഴുക്കിൽപ്പെട്ട കുട്ടിയേയും വിദ്യാർത്ഥികളെയും രക്ഷിച്ച് വാൻ ഡ്രൈവർ

പാലാ: ഒഴുക്കിൽപ്പെട്ട ഒൻപത് വയസുകാരിയേയും രക്ഷിക്കാൻ ശ്രമിക്കുന്നതിനിടെ അപകടത്തിൽപ്പെട്ട വിദ്യാർത്ഥിനികളെയും സാഹസികമായി കരയ്ക്കെത്തിച്ച് വാൻ ഡ്രൈവർ. പാലാ മീനച്ചിൽ വായനശാല ജംഗ്ഷനിലുള്ള മീനച്ചിൽ തോടിന്റെ കടവിൽ ഇന്നലെ വൈകുന്നേരം 6നാണ് സംഭവം.

യാദൃശ്ചികമായി ഇതുവഴി വന്ന വാൻ ഡ്രൈവർ മലപ്പുറം സ്വദേശി ഉനൈസാണ് രക്ഷകനായത്. കടവിന് സമീപമുള്ള ഹോസ്റ്റൽ ജീവനക്കാരിയുടെ മകളാണ് 9 വയസുകാരി. ഹോസ്റ്റലിലെ താമസക്കാരാണ് പെൺകുട്ടികൾ. ഏറെനേരം തോട്ടിലൂടെ ഒഴുകിയ ഇവരെ ഒടുവിൽ കുറ്റില്ലാംകടവിൽ നിന്നും ഉനൈസ് രക്ഷിച്ച് കരയ്ക്ക് കയറ്റുകയായിരുന്നു. ഓട്ടംകഴിഞ്ഞ് മലപ്പുറത്തിന് മടങ്ങുകയായിരുന്ന ഉനൈസ് നിലവിളികേട്ടാണ് സംഭവസ്ഥലത്തെത്തിയത്.