ട്രാൻ.ബസ് അടിച്ചുതകർത്ത യുവാക്കൾ അറസ്റ്റിൽ

മുളന്തുരുത്തി: ആറന്മുളയി​ൽനി​ന്ന് എറണാകുളത്തേക്ക് പോവുകയായിരുന്ന പറവൂർ ഡിപ്പോയിലെ കെ.എസ്.ആർ.ടി.സി ബസിന് നേരെ ആക്രമണം. ബസി​ന്റെ ചി​ല്ല് തകർക്കുകയും ഡ്രൈവറെ ആക്രമി​ക്കുകയും ചെയ്തു. സംഭവത്തി​ൽ കുലയറ്റിക്കര സ്വദേശിയും ഓട്ടോഡ്രൈവറുമായ അഖിൽ (35), കാഞ്ഞിരമറ്റം സ്വദേശി മനു (30) എന്നിവരെ പൊലീസ് അറസ്റ്റുചെയ്തു. കഴി​ഞ്ഞ ദി​വസം രാത്രി​ പത്തോടെയാണ് സംഭവം.

കഞ്ചാവ് കേസിലെ പ്രതികളായ ഇവർ കാഞ്ഞിരമറ്റം മുതൽ ബസിനെ കടത്തിവിടാതെ ഓട്ടോയുമായി​ മാർഗതടസം സൃഷ്ടിക്കുകയായിരുന്നുവെന്ന് പൊലീസ് പറഞ്ഞു. മുളന്തുരുത്തി പള്ളിത്താഴത്തുവച്ച് ബസ് തടഞ്ഞുനിറുത്തി ഇരുവരും ഇരുമ്പുവടി ഉപയോഗിച്ച് ബസ് ഡ്രൈവറെ ആക്രമിച്ചു. ഗ്ലാസും അടിച്ചുതകർത്തു. ഡ്രൈവർ ഫെമിൻദത്തി​ന് (45) ഗുരുതരമായി പരിക്കേറ്റു. കണ്ടക്ടർ ഷെഫീഖിനെയും യാതക്കാരെയും അസഭ്യം പറഞ്ഞ് ആക്രമിക്കാനും ശ്രമിച്ചു. യാത്രക്കാർ പൊലീസിൽ അറിയിച്ചതിനെ തുടർന്നു ഇരുവരും ഓട്ടോയി​ൽ കടന്നുകളഞ്ഞു. തുടർന്ന് അന്നുരാത്രി​തന്നെ ഇരുവരേയും പൊലീസ് പിടികൂടുകയായിരുന്നു. ഇതി​നി​ടയി​ൽ പ്രതികൾ പൊലീസ് ജീപ്പിന്റെ മുൻവശത്തെ ചി​ല്ലും അടിച്ചുതകർത്തു. ഇരുവരെയും ഇന്നലെ റി​മാൻഡ് ചെയ്തു.

മുളന്തുരുത്തി എസ്.എച്ച്.ഒ മനേഷ് കെ. പൗലോസ്, എസ്.ഐമാരായ ലൈസ, പ്രിൻസി, സി.പി.ഒ മാരായ ജിൻസി, ശ്രീജിത്ത് എന്നിവർ പൊലീസ് സംഘത്തി​ലുണ്ടായി​രുന്നു.