വീണ്ടും പണിമുടക്കി എയർടെൽ; മണിക്കൂറുകളോളം സേവനങ്ങൾ തടസപ്പെട്ടു

ന്യൂഡൽഹി: രാജ്യത്തെ മുൻനിര ടെലികോം കമ്പനിയായ ഭാരതി എയർടെല്ലിന്റെ സേവനങ്ങൾ തടസപ്പെട്ടതായി റിപ്പോർട്ട്. ഇന്ന് രാവിലെ മുതലാണ് സേവനങ്ങൾ തടസപ്പെട്ടത്. കോൾ,​ ഡാറ്റ സേവനങ്ങളിലാണ് പ്രശ്നം നേരിട്ടത്. അരമണിക്കൂർ സമയം കൊണ്ട് ആറായിരത്തിലേറെ പരാതികളാണ് ഡൗൺഡിറ്റക്റ്ററിൽ മാത്രം വന്നത്. ബംഗളൂരു, ഡൽഹി, മുംബയ്, ചെന്നെെ, ഹെെദരാബാദ് തുടങ്ങിയ നിരവധി നഗരങ്ങളിൽ നിന്ന് പരാതി ഉയരുന്നുണ്ട്. ഉച്ചയ്ക്ക് 12.15 ഓടെ പരാതികൾ 7,109ആയി ഉയർന്നു. താൽക്കാലിക കണക്‌റ്റിവിറ്റി തടസം മൂലമാണ് പ്രശ്നം ഉണ്ടായതെന്നാണ് അധികൃതർ പറയുന്നത്.

എയർടെൽ കോൾ, ഡാറ്റ സേവനങ്ങൾ തടസപ്പെട്ടതിനെ കുറിച്ച് നിരവധി പരാതികളാണ് എക്സിൽ പേജിൽ പങ്കുവച്ചിരിക്കുന്നത്. പല യൂസർമാരുടെയും പരാതികൾക്ക് ഔദ്യോഗിക അക്കൗണ്ടുകളിൽ നിന്ന് എയർടെൽ അധികൃതർ മറുപടി നൽകുന്നുണ്ട്. അടുത്തിടെയും എയ്ടെൽ സേവനങ്ങൾ ഇത്തരത്തിൽ തടസപ്പെട്ടിരുന്നു.

'അസൗകര്യത്തിൽ ഞങ്ങൾ ഖേദിക്കുന്നു. നിങ്ങൾ നേരിടുന്ന പ്രശ്നം താൽക്കാലിക കണക്റ്റിവിറ്റി തടസ്സം മൂലമാണ്, ഒരു മണിക്കൂറിനുള്ളിൽ ഇത് പരിഹരിക്കപ്പെടുമെന്ന് പ്രതീക്ഷിക്കുന്നു. സേവനങ്ങൾ പുനഃസ്ഥാപിക്കുന്നതിന് ദയവായി നിങ്ങളുടെ മൊബൈൽ ഫോൺ റിസ്റ്റോർ ചെയ്യുക. നന്ദി,"- എയർടെൽ സന്ദേശത്തിൽ വ്യക്തമാക്കുന്നു.