ശുദ്ധമായ കുടിവെള്ളം ഉറപ്പാക്കാൻ പദ്ധതി
ആലപ്പുഴ: സുരക്ഷിത ജലലഭ്യതയും ജലജന്യ രോഗപ്രതിരോധവും ലക്ഷ്യമിട്ട് പുതിയ കർമ്മ പരിപാടിയുമായി ഹരിതകേരളം മിഷൻ. ജലമാണ് ജീവൻ എന്ന പദ്ധതിയിലൂടെ വെള്ളത്തിന്റെ ഗുണനിലവാരം ഉറപ്പുവരുത്തുകയാണ് ലക്ഷ്യം. തദ്ദേശ സ്ഥാപനങ്ങൾ, വിവിധ വകുപ്പുകൾ എന്നിവയുമായി സഹകരിച്ചാണ് പരിപാടി നടപ്പാക്കുന്നത്. ആദ്യഘട്ടത്തിൽ 30, 31 തീയതികളിൽ സംസ്ഥാനത്തെ എല്ലാ കിണറുകളിലും ക്ലോറിനേഷൻ നടത്തും. തുടർന്ന് സെപ്തംബർ എട്ടുമുതൽ 30 വരെ ഹയർസെക്കൻഡറി സ്കൂളുകളിലെ രസതന്ത്രം ലാബുകളിൽ ഹരിതകേരളം മിഷൻ സ്ഥാപിച്ചിട്ടുള്ള ജലഗുണനിലവാര ലാബുകളിൽ കുടിവെള്ളത്തിന്റെ ഗുണനിലവാര പരിശോധന നടത്തും. ജില്ലയിൽ ഇപ്പോൾ 28 ജലഗുണനിലവാര പരിശോധന ലാബുകളാണുള്ളത്. 50എണ്ണം കൂടി പുതുതായി ആരംഭിക്കും. തദ്ദേശ സ്ഥാപനങ്ങൾ വഴിയാണ് പരിശോധനയ്ക്ക് ആവശ്യമായ കിറ്റുകൾ ലഭ്യമാക്കുക. ജില്ലയിൽ 15000 സാമ്പിളുകൾ ശേഖരിക്കുകയാണ് ലക്ഷ്യം. തുടർപ്രവർത്തനങ്ങളുടെ ഭാഗമായി സെപ്തംബർ 20 മുതൽ നവംബർ ഒന്നുവരെ ഉപയോഗയോഗ്യമായ മുഴുവൻ കുളങ്ങളിലും ജലസ്രോതസുകളിലും ശുചീകരണവും മാലിന്യം എത്തുന്ന വഴികൾ അടയ്ക്കലും ജലശുദ്ധി ഉറപ്പാക്കാനുള്ള പ്രവർത്തനങ്ങളും ബോധവത്ക്കരണവും സംഘടിപ്പിക്കും.ആരോഗ്യ വകുപ്പ്, തദ്ദേശ സ്വയംഭരണ വകുപ്പ്, തദ്ദേശ സ്ഥാപനങ്ങൾ എന്നിവ ഏകോപിപ്പിച്ചാണ് കർമ്മപരിപാടി സംഘടിപ്പിക്കുന്നത്. ആശാ പ്രവർത്തകർ, അങ്കണവാടി ജീവനക്കാർ, കുടുംബശ്രീ പ്രവർത്തകർ, ഹരിതകർമ്മസേന, തൊഴിലുറപ്പ് തൊഴിലാളികൾ, സന്നദ്ധ പ്രവർത്തകർ, സന്നദ്ധ സംഘടനകൾ എന്നിവയെ ഉൾപ്പെടുത്തി ജനകീയ കർമ്മപരിപാടിയായാണ് പദ്ധതി നടപ്പിലാക്കുന്നത്.
50 ലാബുകൾ കൂടി ആരംഭിക്കും
അമീബിക് മസ്തിഷ്‌ക ജ്വരം പോലെയുള്ള മാരക രോഗങ്ങൾക്ക് കാരണമാകുന്ന സൂക്ഷ്മജീവികളെ പ്രതിരോധിക്കാൻ കിണറുകളിൽ ക്ലോറിനേഷൻ നടത്തും
പൈപ്പ് വെള്ളം ഉപയോഗിക്കുന്നവർ അത് സംഭരിക്കുന്ന ടാങ്കുകൾ ക്ലോറിനേറ്റ് ചെയ്യേണ്ടത് അത്യാവശ്യമാണ്
കിണറുകളിലെ ജലത്തിന്റെ അളവ് അനുസരിച്ചാണ് ശാസ്ത്രീയമായ ക്ലോറിനേഷൻ നടത്തുന്നത്
ക്ലോറിനേഷനാവശ്യമായ ബ്ലീച്ചിംഗ് പൗഡർ, ക്ലോറിൻ ഗുളികകൾ എന്നിവ തദ്ദേശസ്ഥാപനങ്ങൾ വഴി വിതരണം ചെയ്യും
മെഡിക്കൽ ഓഫീസർമാർ, ഹെൽത്ത് ഇൻസ്‌പെക്ടർമാർ തുടങ്ങിയവർ ക്ലോറിനേഷൻ പ്രവർത്തനങ്ങൾക്ക് വിദഗ്ദ്ധ ഉപദേശം നൽകും
അടുത്ത മാസം ആദ്യം ക്ലോറിനേഷൻ സംബന്ധിച്ച് വിശദമായ കണക്കെടുപ്പും നടത്തും
ജില്ലയിൽ ശേഖരിക്കുന്ന സാമ്പിളുകൾ
15000
കർമ്മപദ്ധതിയുടെ ഭാഗമായുള്ള ഒരുക്കങ്ങൾ ജില്ലയിൽ പൂർത്തിയായി. ജല പരിശോധനയ്ക്ക് ആവശ്യമായ കിറ്റുകൾ തദ്ദേശ സ്ഥാപനങ്ങൾ വഴി ലഭ്യമാക്കും
-കെ.എസ്. രാജേഷ്, ജില്ലാ കോഓർഡിനേറ്റർ, ഹരിതകേരളം മിഷൻ