അടിസ്ഥാന സൗകര്യങ്ങളില്ല; തദ്ദേശതിരഞ്ഞെടുപ്പിൽ വോട്ട് ബഹിഷ്‌കരിക്കാൻ ഒരുങ്ങി വിവിധ ആദിവാസി ഉന്നതികളിലെ ആളുകൾ

മൂന്നാർ: അടിസ്ഥാന സൗകര്യങ്ങളില്ലാത്തതിനാൽ തദ്ദേശതിരഞ്ഞെടുപ്പിൽ വോട്ട് ബഹിഷ്‌കരിക്കാൻ ഒരുങ്ങുകയാണ് വട്ടവട മേഖലയിലെ വിവിധ ആദിവാസി ഉന്നതികളിലുള്ളവർ. സ്വാമിയാറളക്കുടി, കൂടല്ലാറ് കുടി, വത്സപ്പെട്ടിക്കുടി തുടങ്ങി വട്ടവട പഞ്ചായത്തിലെ അഞ്ച് ആദിവാസി ഉന്നതികളിലെ ആളുകളാണ് വരാൻ പോകുന്ന തദ്ദേശ തിരഞ്ഞെടുപ്പിൽ വോട്ട് ബഹിഷ്‌കരണത്തിനൊരുങ്ങുന്നത്. ഈ ആദിവാസി ഉന്നതികളിലേക്കുള്ള റോഡ് ഏറെ നാളുകളായി തകർന്ന് കിടക്കുകയാണ്. ഇത് വലിയ യാത്രാ ക്ലേശമുയർത്തുന്ന സ്ഥിതിയുണ്ട്. ചികിത്സക്കടക്കം വേണ്ടുന്ന മറ്റടിസ്ഥാന സൗകര്യങ്ങളും ഉന്നതികളിൽ അന്യമാണ്. നാളിതുവരെ മാറി മാറി വരുന്ന ഭരണ നേതൃത്വങ്ങൾ ഇക്കാര്യങ്ങളിൽ ഫലപ്രദമായ ഇടപെടൽ നടത്താൻ തയ്യാറാകാത്തതിൽ പ്രതിഷേധിച്ചാണ് തങ്ങൾ വോട്ട് ബഹിഷ്‌കരണത്തിനൊരുങ്ങുന്നതെന്ന് ഉന്നതികളിലെ ആളുകൾ വ്യക്തമാക്കി. വട്ടവട പഞ്ചായത്തിലെ ഒന്ന്, 14 വാർഡുകളിൽ ഉൾപ്പെടുന്ന ആദിവാസി ഉന്നതികളിലെ ആളുകളാണ് വോട്ട് ബഹിഷ്‌കരണ തീരുമാനവുമായി മുമ്പോട്ട് പോകുന്നത്. വോട്ട് ബഹിഷ്‌കരിക്കുക മാത്രമല്ല ഈ വാർഡുകളിൽ തദ്ദേശ തിരഞ്ഞെടുപ്പിൽ മത്സരിക്കാൻ പ്രതിനിധികളെ നിറുത്താനും വിവിധ രാഷ്ട്രീയ പാർട്ടികളെ അനുവദിക്കില്ലെന്ന നിലപാടിലാണ് ഉന്നതികളിലെ ആളുകൾ. ഇനിയെങ്കിലും റോഡടക്കം ഉന്നതികളിലേക്ക് വേണ്ടുന്ന അടിസ്ഥാന സൗകര്യം ഒരുക്കാൻ ബന്ധപ്പെട്ടവർ തയ്യാറാകണമെന്നും ഉന്നതികളിലെ കുടുംബങ്ങൾ ആവശ്യമുന്നയിക്കുന്നു.