ഭാര്യ പിണങ്ങിപ്പോയതിന്റെ ദേഷ്യത്തിൽ മകളുടെ ദേഹത്ത് ആസിഡൊഴിച്ചു, സഹോദരന്റെ 10 വയസുള്ള മകൾക്കും ഗുരുതര പരിക്ക്

കാസർകോട്: ഭാര്യ പിണങ്ങിപ്പോയതിന്റെ ദേഷ്യം തീർക്കാൻ മകളുടെ നേരേ പിതാവിന്റെ ആസിഡാക്രമണം. കാസർകോട് പനത്തടി പാറക്കടവിലായിരുന്നു പതിനേഴുകാരിക്കുനേരെയാണ് ആക്രമണമുണ്ടായത്. സംഭവത്തിൽ സഹോദരന്റെ പത്തുവയസുള്ള മകൾക്കും പൊള്ളലേറ്റു. ഗുരുതരമായി പരിക്കേറ്റ ഇരുവരെയും ആശുപത്രിയിൽ പ്രവേശിപ്പിച്ചു. കർണാടക കരിക്കെ ആനപ്പാറ സ്വദേശി മനോജാണ് കൊടും ക്രൂരത കാണിച്ചത്. ആക്രമണത്തിനുശേഷം രക്ഷപ്പെട്ട ഇയാൾക്കുവേണ്ടി തെരച്ചിലാരംഭിച്ചു.

മദ്യപിച്ച് സ്ഥിരം പ്രശ്നമുണ്ടാക്കുന്ന ആളാണ് മനോജ്. ഇതുകാരണം ഭാര്യയും മകളും കുറച്ചുകാലമായി പിണങ്ങിക്കഴിയുകയായിരുന്നു. സഹോദരന്റെ വീട്ടിൽ ഇവർ എത്തിയെന്ന് അറിഞ്ഞ് അവിടെയെത്തിയ മനോജ് ആക്രമണം നടത്തുകയായിരുന്നു എന്നാണ് പൊലീസ് പറയുന്നത്. റബർ ഷീറ്റ് നിർമ്മിക്കാനായി ഉപയോഗിക്കുന്ന ആസിഡാണ് ഇയാൾ കുട്ടികൾക്കുനേരെ ഒഴിച്ചത്. പതിനേഴുകാരിയുടെ കൈകാലുകൾക്കാണ് പൊള്ളലേറ്റത്. പത്തുവയസുകാരിക്ക് മുഖത്തടക്കം പൊള്ളലുണ്ട്.

ആസിഡ് ആക്രമണത്തിന് പുറമേ കൊലപാതക ശ്രമം, വീട്ടിൽ അതിക്രമിച്ചുകയറൽ തുടങ്ങിയ വകുപ്പുകളും ഇയാൾക്കെതിരെ ചുമത്തിയിട്ടുണ്ട്. കുടുംബപ്രശ്നങ്ങളല്ലാതെ ആക്രമണത്തിന് പിന്നിൽ മറ്റുകാരണങ്ങൾ ഉണ്ടെന്ന് കരുതുന്നില്ലെന്നാണ് പൊലീസ് പറയുന്നത്.