'ഞാൻ മരിച്ചിട്ടില്ല'; പ്രചരിക്കുന്ന വാർത്തകളിൽ പ്രതികരിച്ച് നടി കാജൽ അഗർവാൾ

കഴിഞ്ഞ ദിവസമാണ് നടി കാജൽ അഗർവാൾ വാഹനാപകടത്തിൽ മരിച്ചുവെന്ന വാർത്ത സോഷ്യൽ മീഡിയയിൽ പ്രചരിച്ചത്. അഭ്യൂഹങ്ങൾ വൻതോതിൽ പ്രചരിച്ചതിന് പിന്നാലെ നടി തന്നെ പ്രതികരണവുമായി രംഗത്തെത്തിയിട്ടുണ്ട്. വാർത്ത പൂർണമായും അടിസ്ഥാനരഹിതമാണെന്നാണ് കാജൽ ഇൻസ്റ്റാഗ്രാം സ്റ്റോറിയിലൂടെ വ്യക്തമാക്കിയത്. കാജൽ ഒരു റോഡപകടത്തിൽപ്പെട്ടുവെന്നും ഗുരുതരമായി പരിക്കേറ്റുവെന്നുമായിരുന്നു ആദ്യം പ്രചരിച്ച പോസ്റ്റുകൾ. പിന്നീട് മരണപ്പെട്ടുവെന്ന തരത്തിലുള്ള അഭ്യൂഹങ്ങളും പ്രചരിച്ചു. തുടർന്നാണ് സംഭവത്തിൽ പ്രതികരിച്ച് നടി തന്നെ രംഗത്തെത്തിയത്.

'ഞാൻ ഒരു അപകടത്തിൽപ്പെട്ടുവെന്നും ഇപ്പോൾ ജീവിച്ചിരിപ്പില്ലെന്നും അവകാശപ്പെടുന്ന ചില വാർത്തകൾ കണ്ടു. ഇത് അടിസ്ഥാനരഹിതമാണ്. ദെെവത്തിന്റെ കൃപയാൽ ഞാൻ പൂർണമായും സുഖമായും സുരക്ഷിതയായും ഇരിക്കുന്നു. ഇത് നിങ്ങളെ അറിയിക്കണമെന്ന് തോന്നി. ദയവായി തെറ്റായ വാർത്തകൾ വിശ്വസിക്കുകയോ പ്രചരിപ്പിക്കുകയോ ചെയ്യരുത്'- കാജൽ കുറിച്ചു.

2004ൽ പുറത്തിറങ്ങിയ 'ക്യൂൻ! ഹോ ഗയാ ന' എന്ന ഹിന്ദി ചിത്രത്തിലൂടെയാണ് കാജൽ അഗർവാൾ വെള്ളിത്തിരയിൽ അരങ്ങേറ്റം കുറിച്ചത്. പിന്നാലെ തമിഴ്, തെലുങ്ക് സിനിമാ ലോകത്തെ പ്രിയ താരമായി നടി മാറി. 2020 ഒക്ടോബർ 30ന് ആണ് കാജൽ അഗർവാളും ഗൗതം കിച്ലുവും വിവാഹിതരായത്. കാജലിന്റെ ബാല്യകാല സുഹൃത്താണ് ഗൗതം കിച്ലു. 2022ഏപ്രിൽ 19 നാണ് കാജലിനും ഗൗതമിനും മകൻ നീൽ പിറന്നത്. സൽമാൻ ഖാൻ നായകനായ സിക്കന്ദർ സിനിമയിലാണ് കാജൽ അഗർവാൾ ഒടുവിൽ അഭിനയിച്ചത്. കണ്ണപ്പയിലും അതിഥിവേഷത്തിലും കാജൽ എത്തിയിരുന്നു.