വൈക്കം വെച്ചൂർ റോഡ് അ​റ്റകു​റ്റപണി തുടങ്ങി

വൈക്കം: വൈക്കം വെച്ചൂർ റോഡിൽ തകർന്ന ഭാഗങ്ങൾ സഞ്ചാരയോഗ്യമാക്കുന്നതിന് അ​റ്റകു​റ്റപ്പണികൾ ആരംഭിച്ചു. റോഡിലെ വലിയ കുഴികൾ ക്വാറി പൊടിയും മെ​റ്റലും ഇട്ട് അടച്ചു. തോട്ടകം മുതൽ വെച്ചൂർ വരെയുള്ള ഭാഗങ്ങളിൽ വലുതും ചെറുതുമായ കുഴികൾ രൂപപ്പെട്ടതുമൂലം യാത്ര ദുഷ്‌കരമായിരുന്നു. ഇതേത്തുടർന്ന് റോഡ് സഞ്ചാരയോഗ്യമാക്കുന്നതിന് കഴിഞ്ഞ ജൂലൈ മാസത്തിൽ കേരള റോഡ് ഫണ്ട് ബോർഡ് 25 ലക്ഷം രൂപ അനുവദിച്ചിരുന്നു. തുടർന്ന് പ്രവൃത്തി ടെണ്ടർ ചെയ്‌തെങ്കിലും സാങ്കേതിക പ്രശ്നങ്ങളെ തുടർന്ന് ടെണ്ടർ റദ്ദാക്കുകയായിരുന്നു. പിന്നീട് റീടെണ്ടർ ചെയ്തു നടപടികൾ പൂർത്തീകരിച്ചാണ് ഇപ്പോൾ പണി ആരംഭിച്ചിരിക്കുന്നത്. കാലാവസ്ഥ അനുകൂലമാകുന്ന മുറയ്ക്ക് മോശമായ ഭാഗത്ത് ടാറിങ് നടത്തി റോഡ് പൂർണമായും സഞ്ചാരയോഗ്യമാക്കുമെന്ന് കെ.ആർ.എഫ്.ബി അധികൃതർ അറിയിച്ചു.