വിഭാഗീയത; ഡി.വൈ.എഫ്.ഐ പുന്നമട മേഖലാസമ്മേളനം മാറ്റിവച്ചു

ആലപ്പുഴ: പ്രതിനിധികൾ എത്താത്തതിനെ തുടർന്ന് ഡി.വൈ.എഫ്​.ഐ മേഖലാസമ്മേളനം മാറ്റിവച്ചു. കൊറ്റംകുളങ്ങര സഹകരണബാങ്ക്​ ഓഡിറ്റോറിയത്തിൽ കഴിഞ്ഞ ദിവസം സംഘടിപ്പിച്ച പുന്നമട മേഖലാസമ്മേളനമാണ്​ പ്രതിനിധികളുടെ കുറവുകാരണം നടക്കാതെ പോയത്. 80പ്രതിനിധികളിൽ 20 പേർ മാത്രമാണ്​ പങ്കെടുത്തത്. തുടർന്ന്​ ഉദ്ഘാടകനായെത്തിയ ഡി.വൈ.എഫ്.ഐ ജില്ലസെക്രട്ടറിയും നേതാക്കളും മടങ്ങിപ്പോയി.

ആലപ്പുഴ നഗരസഭയിലെ നാലുവാർഡുകൾ ഉൾപ്പെടുന്ന പ്രദേശത്ത്​ സി.പി.എമ്മിനും ഡി.വൈ.എഫ്​.ഐക്കും ശക്തമായ വേരോട്ടമുള്ളതാണ്. സ്വാഗതസംഘം രൂപീകരിച്ച് ആഴ്ചകളായി പ്രവർത്തിച്ചിട്ടും ഭൂരിഭാഗം പ്രതിനിധികളും വിട്ടുനിന്നത് നേതൃത്വത്തിന് കനത്ത തിരിച്ചടിയായി.

ആളുകുറഞ്ഞതിനെച്ചൊല്ലി നേതാക്കൾ പരസ്​പരം പരിചാഴിയതോടെ​ നേതൃത്വം ഇടപെട്ട്​ സമ്മേളനം നിറുത്തിവയ്ക്കുകയായിരുന്നു. വിഭാഗീയത​യെത്തുടർന്ന്​ ചില യൂണിറ്റ്​ ഭാരവാഹികളെ ഒഴിവാക്കിയതും ചിലർ ഗുരുവായൂരിലേക്ക്​ പോയതുമാണ്​ പ്രതിനിധികൾ കുറയാൻ കാരണമെന്നാണ്​ അറിയുന്നത്.

15 യൂണിറ്റ് സമ്മേളനങ്ങളിൽ​ 10എണ്ണം മാത്രമാണ് നടന്നത്​. യൂണിറ്റ്​ സമ്മേളനം പൂർത്തിയാക്കാതെ മേഖലാസമ്മേളനം നടത്തിയത്​ ചിലയാളുകളെ മനപൂർവം ഒഴിവാക്കാൻ വേണ്ടിയാണെന്നും പരാതിയുമുണ്ട്​.

പ്രാദേശിക സി.പി.എം, ഡി.വൈ.എഫ്.ഐ നേതൃത്വത്തോടുള്ള പ്രവർത്തകരുടെ എതിർപ്പാണ് സമ്മേളനത്തിലേക്ക്​ ആളുകൾ എത്താതിരുന്നതെന്നും അറിയുന്നു. എന്നാൽ, സംഘാടനപരമായ നടപടിക്രമം പാലിച്ചു​മാത്രമേ സമ്മേളനം നടത്താൻ കഴിയൂവെന്നും അതിനാലാണ്​ മാറ്റിവച്ചതെന്നുമാണ്​​ നേതാക്കളുടെ വിശദീകരണം.