വൻ ശമ്പളത്തോടെ സർക്കാർ ജോലി; ഒക്‌ടോബർ 15ന് മുമ്പ് അപേക്ഷകൾ സമർപ്പിക്കൂ, പ്രായപരിധി 40
ഡൽഹി പൊലീസിൽ ജോലി നേടാൻ സുവർണാവസരം. ഹെഡ് കോൺസ്റ്റബിൾ (വയർലസ് ഓപ്പറേറ്റർ/ ടെലി പ്രിന്റർ ഓപ്പറേറ്റർ), കോൺസ്റ്റബിൾ (എക്‌സിക്യൂട്ടീവ്, പുരുഷൻ, സ്‌ത്രീ), കോൺസ്റ്റബിൾ (ഡ്രൈവർ) എന്നീ തസ്‌തികകളിലാണ് ഒഴിവുകൾ റിപ്പോർട്ട് ചെയ്‌തിരിക്കുന്നത്. ഈ തസ്‌തികകളിൽ നിയമനം നടത്തുന്നതിനായി സ്റ്റാഫ് സെലക്ഷൻ കമ്മീഷൻ ഡിസംബർ/ ജനുവരി മാസങ്ങളിൽ പരീക്ഷകൾ നടത്തും.
ഈ തസ്‌തികകളിലേക്ക് അപേക്ഷിക്കുന്നതിനും കൂടുതൽ വിശദാംശങ്ങൾ അറിയുന്നതിനും https://ssc.gov.in/ എന്ന വെബ്‌സൈറ്റ് സന്ദർശിക്കാവുന്നതാണ്. ഈ മാസം 15 വരെ അപേക്ഷകൾ ഓൺലൈനായി നൽകാം. ഓൺലൈൻ അപേക്ഷാ ഫോം പൂരിപ്പിക്കുന്നതിലെ സംശയങ്ങൾക്കായി 180 030 930 63 എന്ന ടോൾഫ്രീ നമ്പറിൽ വിളിക്കാവുന്നതാണ്. പരീക്ഷാ തീയതി ഈ വെബ്‌സൈറ്റിലൂടെ തന്നെ അറിയാൻ സാധിക്കും. ഇംഗ്ലീഷ്, ഹിന്ദി ഭാഷകളിലാണ് പരീക്ഷ. 25,500 മുതൽ 81,100 രൂപ വരെയാണ് ശമ്പളം.
അപേക്ഷകൻ ഇന്ത്യക്കാരനായിരിക്കണം. 35 വയസാണ് അപേക്ഷകൾ സമർപ്പിക്കേണ്ട പ്രായപരിധി. ഒബിസി വിഭാഗത്തിൽപ്പെടുന്നവർക്ക് 38 വയസാണ്. എസ്‌സി/എസ്‌ടി, പുനർ വിവാഹം ചെയ്യാത്ത വിധവകൾ, നിയമപരമായി വിവാഹ മോചിതരായ സ്‌ത്രീകൾ എന്നിവർക്ക് 40 വയസാണ് പ്രായപരിധി. അപേക്ഷാ ഫീസ് ഉണ്ടായിരിക്കുന്നതാണ്. ഇതിന്റെ കൂടുതൽ വിശദാംശങ്ങളും എസ്‌എസ്‌സി ഔദ്യോഗിക വെബ്‌സൈറ്റിലൂടെ അറിയാൻ സാധിക്കും.