കോടിക്കണക്കിന് യാത്രക്കാരുടെ ആവശ്യം; ഒടുവില്‍ റെയില്‍വേ ആ മാറ്റം യാഥാര്‍ത്ഥ്യമാക്കുന്നു
ന്യൂഡല്‍ഹി: ട്രെയിന്‍ യാത്രകള്‍ക്കായി ടിക്കറ്റ് ബുക്ക് ചെയ്ത ശേഷം യാത്രാ തീയതിയില്‍ മാറ്റം വന്നാല്‍ എന്ത് ചെയ്യും? ടിക്കറ്റ് ക്യാന്‍സല്‍ ചെയ്ത് കിട്ടുന്ന പണം ബാക്കി വാങ്ങുക എന്നതാണ് സാധാരണഗതിയില്‍ യാത്രക്കാര്‍ ചെയ്തിരുന്നത്. ഇത്തരത്തില്‍ ടിക്കറ്റുകള്‍ റദ്ദാക്കുമ്പോള്‍ കനത്ത തുക ക്യാന്‍സലേഷന്‍ ഫീസ് ഇനത്തില്‍ റെയില്‍വേ ഈടാക്കിയിരുന്നു. ഈ രീതിക്ക് അടുത്ത വര്‍ഷം ആദ്യം മുതല്‍ മാറ്റം കൊണ്ടുവരികയാണ് ഇന്ത്യന്‍ റെയില്‍വേ.
പണം നഷ്ടപ്പെടാതെ യാത്രാ തീയതിയില്‍ മാറ്റം വരുത്താന്‍ കഴിയുന്നതാണ് പുതിയ രീതി. ടിക്കറ്റ് ബുക്ക് ചെയ്ത തീയതിയിലെ യാത്ര മാറ്റിവയ്‌ക്കേണ്ടി വന്നാല്‍ ഇനി മുതല്‍ പ്രത്യേക തുക നല്‍കാതെ ഓണ്‍ലൈനായി തന്നെ തീയതില്‍ മാറ്റം വരുത്താന്‍ കഴിയുമെന്ന് കേന്ദ്ര റെയില്‍വേ മന്ത്രി അശ്വിനി വൈഷ്ണവ് അറിയിച്ചു. ഒരു ദേശീയ മാദ്ധ്യമത്തോട് സംസാരിക്കുമ്പോഴാണ് അദ്ദേഹം ഇക്കാര്യം പറഞ്ഞത്. എന്നാല്‍ തീയതി മാറ്റുന്നതുകൊണ്ട് ടിക്കറ്റ് ലഭിക്കുമെന്ന് ഉറപ്പിക്കാന്‍ പുതിയതായി ബുക്കിംഗ് മാറ്റുന്ന തീയതിയിലെ ട്രെയിനിലെ ടിക്കറ്റ് ലഭ്യത ഉറപ്പുവരുത്തേണ്ടി വരുമെന്ന് മാത്രം.
നിലവിലുള്ള രീതിയില്‍ ക്യാന്‍സല്‍ ചെയ്യുന്ന ടിക്കറ്റിന് വലിയ തുക ഈടാക്കുന്ന രീതി യാത്രക്കാര്‍ക്ക് സ്വീകാര്യമല്ലെന്ന് മനസ്സിലാക്കിയാണ് പുതിയ മാറ്റമെന്നും കേന്ദ്രമന്ത്രി പറഞ്ഞു. ഇപ്പോഴത്തെ ക്യാന്‍സലേഷന്‍ നിയമം അനുസരിച്ച് പുറപ്പെടുന്നതിന് 48 മുതല്‍ 12 മണിക്കൂര്‍ മുമ്പ് വരെ ടിക്കറ്റ് റദ്ദാക്കിയാല്‍ യാത്രാക്കൂലിയുടെ 25 ശതമാനമാണ് കുറവ് വരിക. പുറപ്പെടുന്നതിന് 12 മുതല്‍ 4 മണിക്കൂര്‍ മുമ്പുള്ള റദ്ദാക്കലുകള്‍ക്ക് പിഴ കൂടുതലാണ്. റിസര്‍വേഷന്‍ ചാര്‍ട്ട് തയ്യാറാക്കി കഴിഞ്ഞാല്‍ റദ്ദാക്കലുകള്‍ക്ക് പണം തിരികെ ലഭിക്കാറില്ല.