ലൈറ്റ് അണയ്ക്കുന്നതിനെച്ചൊല്ലി ത‌ർക്കം; ഡംബൽ കൊണ്ട് സഹപ്രവർത്തകനെ അടിച്ചു കൊന്ന് യുവാവ്

ബംഗളൂരു: വാടകയ്ക്കെടുത്ത ഓഫീസിനുള്ളിൽ ലൈറ്റ് അണയ്ക്കാത്തതിനെച്ചൊല്ലി സഹപ്രവർത്തകനെ ‌ഡംബൽ കൊണ്ട് അടിച്ചു കൊന്ന് യുവാവ്. ചിത്രദു‌ർഗ്ഗ സ്വദേശിയായ ഭീമേഷ് ബാബു (41)​ ആണ് മരിച്ചത്. ഇന്ന് പുലർച്ചെ 1.30ഓടെ ബംഗളൂരുവിലെ ഡാറ്റാ ഡിജിറ്റൽ ബാങ്ക് എന്ന കമ്പനിയുടെ ഓഫീസിലാണ് കൊലപാതകം നടന്നത്. വിജയവാഡ സ്വദേശിയായ സൊമാല വംശി (24)​ ആണ് കൊല നടത്തിയത്.

രാത്രി ഷിഫ്റ്റിൽ ജോലി ചെയ്തിരുന്ന ഇരുവരും തമ്മിൽ ലൈറ്റ് അണയ്ക്കുന്നതിനെച്ചൊല്ലി വാക്കുതർക്കമുണ്ടാകുകയും തുടർന്ന് രോഷാകുലനായ വംശി, സഹപ്രവർത്തകനായ ഭീമേഷിന്റെ നെറ്റിയിൽ ഡംബൽ കൊണ്ട് അടിക്കുകയായിരുന്നു. ഗുരുതരമായി പരിക്കേറ്റ ഭീമേഷ് സംഭവസ്ഥലത്തുവച്ചുതന്നെ മരിച്ചു.

കൃത്യം നടത്തിയ ശേഷം പ്രതിയായ സൊമാല വംശി തന്നെ നേരിട്ട് പൊലീസ് സ്റ്റേഷനിലെത്തി കീഴടങ്ങുകയായിരുന്നു. വംശിക്കെതിരെ കൊലപാതകത്തിന് കേസെടുത്ത് അറസ്റ്റ് രേഖപ്പെടുത്തിയിട്ടുണ്ടെന്ന് പൊലീസ് പറഞ്ഞു. സംഭവത്തിൽ കൂടുതൽ അന്വേഷണം നടന്നുവരികയാണെന്നും പൊലീസ് അറിയിച്ചു.