വോൾവോ സ്ളീപ്പർ ബസിൽ യാത്രക്കാരന്റെ പക്കൽ നിന്ന് ഒന്നരകോടിയുടെ കുഴൽപ്പണം പിടികൂടി എക്സൈസ്
കൽപ്പറ്റ: കർണാടക ആ‌ർടിസിൽ യാത്ര ചെയ്യുകയായിരുന്ന യുവാവിന്റെ പക്കൽനിന്ന് ഒന്നര കോടി രൂപയോളം കുഴൽപ്പണം പിടിച്ചെടുത്തു. വയനാട് മീനങ്ങാടിയിൽ വച്ചാണ് സംഭവം. ഇന്ന് പുലർച്ചെ മൂന്ന് മണിക്ക് മൈസൂരു-കോഴിക്കോട് ദേശീയപാതയിൽ വച്ച് നടത്തിയ വാഹന പരിശോധനയിൽ മലപ്പുറം തിരൂരങ്ങാടി വള്ളിക്കുന്ന് സ്വദേശി അബ്ദുൾ റസാഖിന്റെ പക്കൽ നിന്നാണ് എക്സൈസ് പണം പിടികൂടിയത്. ബംഗളൂരുവിൽ നിന്ന് കോഴിക്കോട്ടേയ്ക്ക് പോവുകയായിരുന്ന കർണാടക ആർടിസിയുടെ വോൾവോ സ്ളീപ്പർ ബസിൽ യാത്ര ചെയ്യുകയായിരുന്നു ഇയാൾ.
എക്സൈസ് നടത്തിയ പരിശോധനയിൽ രേഖകൾ ഇല്ലാതെ കടത്തിയ 1.36 കോടി രൂപയാണ് പിടിച്ചെടുത്തത്. വയനാട് ഡെപ്യൂട്ടി എക്സൈസ് കമ്മിഷണറുടെ മേൽനോട്ടത്തിൽ സുൽത്താൻ ബത്തേരി എക്സൈസ് സർക്കിൾ ഇൻസ്പെക്ടർ സുനിലിന്റെയും എക്സൈസ് റേഞ്ച് ഇൻസ്പെക്ടർ ബാബുരാജിന്റെയും നേതൃത്വത്തിലുള്ള സംഘമാണ് വാഹന പരിശോധന നടത്തിയത്. പിടികൂടിയ തുക തുടർനടപടികൾക്കായി ആദായനികുതി വകുപ്പിന് കൈമാറുമെന്ന് വയനാട് ഡെപ്യൂട്ടി എക്സൈസ് കമ്മിഷണർ എ ജെ ഷാജി അറിയിച്ചു.