വിമാന യാത്രക്കാർക്ക് ആശ്വാസ വ്യവസ്ഥ

യാത്രകൾ ജീവിതത്തിന്റെ ഭാഗമാവുകയും,​ ജീവിതം ലോകത്തോളം തന്നെ വളരുകയും ചെയ്തതോടെയാണ് വിമാനയാത്രകൾ സാധാരണക്കാരുടെ കൂടി കാര്യമായി മാറിയത്. അതുകൊണ്ടുതന്നെ വിമാനയാത്രയുമായി ബന്ധപ്പെട്ട ഏതു കാര്യവും ഇന്ന് പ്രവാസികളുടെ മാത്രമല്ല,​ ബിസിനസുകാരുടെയും വിനോദസഞ്ചാരികളുടെയും കുടുംബങ്ങളുടെയുമൊക്കെ വിഷയമാണ്. വിദേശങ്ങളിൽ നിന്ന് നാട്ടിലേക്കും തിരിച്ചും യാത്രക്കാരുടെ എണ്ണം വർദ്ധിക്കുന്ന ഉത്സവ സീസണുകളിലെയും മറ്റും നിരക്കുകൊള്ളയുടെ വർത്തമാനങ്ങൾ മാത്രമാണ് പതിവായി കേൾക്കാറുള്ളതെങ്കിൽ,​ ടിക്കറ്റ് ബുക്കിംഗും റദ്ദാക്കലുമായി ബന്ധപ്പെട്ട ചില വ്യവസ്ഥകൾ ഇളവുകളോടെ പരിഷ്കരിക്കുന്നതിന്റെ കരട് വ്യോമയാന ഡയറക്ടറേറ്റ് കഴിഞ്ഞ ദിവസം പ്രസിദ്ധീകരിച്ചത് ആകാശയാത്രികർക്ക് ആശ്വാസവും പ്രതീക്ഷയും പകരുന്നതാണ്.

വിമാന ടിക്കറ്റ് ബുക്ക് ചെയ്തതിനു ശേഷം 48 മണിക്കൂർ വരെയുള്ള സമയത്ത് അത് റദ്ദാക്കാനോ,​ യാത്രാ തീയതി മാറ്റിയെടുക്കാനോ അധിക ചാർജ് നൽകേണ്ടതില്ലാത്ത വിധത്തിലാണ് വ്യവസ്ഥകളിലെ പ്രധാന പരിഷ്കാരത്തിന് വഴിയൊരുങ്ങുന്നത്. അതായത്,​ ബുക്കിംഗിനു ശേഷം രണ്ടുദിവസംവരെയുള്ള ഇടവേളയിൽ ടിക്കറ്റ് ക്യാൻസൽ ചെയ്യേണ്ടിവരികയോ,​ തീയതി മാറ്റുകയോ വേണ്ടിവന്നാൽ യാത്രക്കാരന് ഒരുരൂപ പോലും നഷ്ടമാകില്ല. നിശ്ചയിച്ച യാത്ര പലപ്പോഴും മാറ്റിവയ്ക്കേണ്ടിവരുന്നത് ഉറ്റവരുടെ മരണമോ,​ അപകടമോ,​ ശസ്ത്രക്രിയകളോ പോലെ അടിയന്തര സാഹചര്യങ്ങളിലായിരിക്കും. അപ്രതീക്ഷിതവും ഒഴിവാക്കാനാവാത്തതുമായ ഇത്തരം വേളകളിൽ യാത്ര റദ്ദാക്കേണ്ടിവരികയോ,​ നീട്ടിവയ്ക്കേണ്ടിവരികയോ ചെയ്യാം. ആ അടിയന്തര സാഹചര്യത്തിൽ ലഭിക്കുന്ന ഇത്തരം ഇളവുകൾ യാത്രക്കാരനെ സംബന്ധിച്ച് വലിയ ആശ്വാസം തന്നെയാണ്.

വിമാന ടിക്കറ്റ് നിരക്കുകളിൽ സേവർ ഫെയർ എന്നും ഫ്ളെക്സി എന്നും പൊതുവെ രണ്ടു വിഭാഗമുണ്ട്. യാത്രാനിരക്ക് താരതമ്യേന കുറവുള്ള ബഡ്ജറ്റ് എയർലൈനുകളിലാണ് സേവർ ഫെയർ സൗകര്യമുള്ളത്. ഈ വിഭാഗത്തിൽ ടിക്കറ്റ് ക്യാൻസലേഷനും തീയതി മാറ്റലിനും നിലവിൽ സൗകര്യമില്ല. ഫ്ളെക്സി സ്വഭാവമുള്ള ടിക്കറ്റുകളുടെ കാര്യത്തിൽ,​ ക്യാൻസലേഷനും തീയതി മാറ്റിയെടുക്കലും വേണ്ടിവരുമ്പോൾ ആഭ്യന്തര ടിക്കറ്റുകൾക്ക് 500 മുതൽ ആയിരം രൂപ വരെയും,​ വിദേശങ്ങളിലേക്കുള്ള ടിക്കറ്റുകൾക്ക് 2000 മുതൽ 5000 രൂപ വരെയുമാണ് നിലവിൽ നഷ്ടമാവുക. ബാക്കി തുകയേ തിരികെ ലഭിക്കൂ. പുതിയ വ്യവസ്ഥ അംഗീകരിക്കപ്പെട്ടാൽ 48 മണിക്കൂറിനകമാണ് ടിക്കറ്റ് റദ്ദാക്കലെങ്കിൽ മുഴുവൻ തുകയും തിരികെ ലഭിക്കും. അതേസമയം,​ എയർലൈൻ കമ്പനിയുടെ വെബ് സൈറ്റിലൂടെ ടിക്കറ്റ് എടുക്കുന്നവർക്കു മാത്രമായിരിക്കും ഈ ഇളവ്. ഗൾഫ് രാജ്യങ്ങളിലേക്കും മറ്റും യാത്രചെയ്യുന്ന സാധാരണക്കാരിൽ അധികം പേരും ട്രാവൽ ഏജൻസികൾ മുഖേനയോ ഇതര വെബ് സൈറ്റുകളിലൂടെ നേരിട്ടോ ബുക്കിംഗ് നടത്തുന്നവരാകും. ഇവർക്കു കൂടി ഈ ഇളവിന് അവസരമൊരുക്കിയാൽ ഡി.ജി.സി.എയുടെ പരിഷ്കാരം കൂടുതൽ ജനപ്രിയമാകും.

അതേസമയം,​ രാജ്യത്തിനകത്തെ യാത്രയ്ക്കായി അഞ്ചു ദിവസം മുമ്പ് ടിക്കറ്റെടുക്കുന്നവർക്കും,​ രാജ്യാന്തര സർവീസുകളിൽ 15 ദിവസത്തിനകം ടിക്കറ്റെടുക്കുന്നവർക്കും സൗജന്യ റദ്ദാക്കലിനോ,​ ടിക്കറ്റ് മാറ്റിയെടുക്കലിനോ സൗകര്യമുണ്ടാകില്ല. വൈകിയുണ്ടാകുന്ന ഒഴിവുകളിലേക്ക് പുതിയ ബുക്കിംഗ് ലഭിക്കാൻ സാദ്ധ്യത കുറയുമെന്നതാണ് കാരണം. അതുപോലെ തന്നെ,​ ടിക്കറ്റുകൾ റദ്ദാക്കിയാൽ പണം തിരികെ ലഭിക്കുന്നതിന് 30 ദിവസംവരെ വേണ്ടിവന്നിരുന്നത് 21 ദിവസമായി കുറയ്ക്കുന്നതാണ് പുതുക്കുന്ന വ്യവസ്ഥകളിലൊന്ന്. ഇത് എയർലൈൻ കമ്പനികളുടെ ഉത്തരവാദിത്വമായിരിക്കും. എന്തായാലും,​ ആകാശയാത്രകളുടെ കാര്യത്തിൽ യാത്രികരുടെ താത്പര്യങ്ങൾക്ക് ഒരിക്കലും മുൻതൂക്കം കിട്ടാറില്ലെന്ന പരാതിക്ക് വലിയൊരളവ് പരിഹാരമാകുന്നതാണ് നിർദ്ദിഷ്ട വ്യവസ്ഥകൾ. നേരത്തേ സൂചിപ്പിച്ചതുപോലെ, എയർലൈൻ കമ്പനികളുടെ വെബ്സൈറ്റുകളിലൂടെയല്ലാതെ ടിക്കറ്റ് ബുക്ക് ചെയ്തവർക്കും അധികചാർജ് ഒഴിവാകുന്ന ആനുകൂല്യം ലഭിക്കുന്ന വിധത്തിൽ വ്യവസ്ഥയിൽ ഭേദഗതി വരുത്തി,​ എത്രയും വേഗം പ്രാബല്യത്തിൽ വരുത്തുകയാണ് വേണ്ടത്.