ഒരു കുടുംബത്തിൽ നിന്ന് നാല് സ്ഥാനാർത്ഥികൾ: എം.ഒ മാധവന്റെ കുടുംബത്തിന് തിരഞ്ഞെടുപ്പ് വീട്ടുകാര്യം
കണ്ണൂർ: ശ്രീകണ്ഠാപുരം നഗരസഭ 24ാം വാർഡ് ആവണക്കോലിൽ നിന്നും മത്സരിക്കുന്ന യു.ഡി.എഫ് സ്ഥാനാർത്ഥി എം.ഒ.മാധവന്റെ കുടുംബത്തിന് ഇലക്ഷൻ പുത്തരിയല്ല.പക്ഷെ മരുമക്കളായ പ്രമീളയും ശ്രീജയും സഹോദരപുത്രി ടി.കെ.സുലൈഖയും കൂടി മത്സരത്തിനിറങ്ങിയപ്പോൾ തദ്ദേശതിരഞ്ഞെടുപ്പ് ഇവരുടെ കുടുംബകാര്യമായിരിക്കുകയാണ്.
മാധവന്റെ സഹോദരിമാരുടെ മക്കളായ എം.ഒ.പ്രമീള, എം.ഒ.ശ്രീജ സഹോദരന്റെ മകൾ ടി.കെ.സുലേഖ എന്നിവരാണ് കുടുംബത്തിലെ മറ്റ് സ്ഥാനാർത്ഥികൾ.മാധവൻ കോൺഗ്രസ് ടിക്കറ്റിലെങ്കിലും മരുമക്കൾ ആ വഴിക്കല്ല. ഇരുപതാം വാർഡ് വയക്കരയിൽ എൽ.ഡി.എഫ് സ്വതന്ത്രയാണ് എം.ഒ.പ്രമീള, ഇരിക്കൂർ ബ്ലോക്ക് പഞ്ചായത്തിലെ 9ാം വാർഡ് മലപ്പട്ടം ഡിവിഷനിൽ എൽ.ഡി.എഫ് സ്ഥാനാർത്ഥിയാണ് സഹോദരപുത്രി ടി.കെ.സുലേഖ, ഇരിക്കൂർ പഞ്ചായത്തിലെ 13ാം വാർഡ് കുട്ടാവിൽ യു.ഡി.എഫ് സ്ഥാനാർത്ഥിയായ എം.ഒ.ശ്രീജ അമ്മാവന്റെ രാഷ്ട്രീയപാതയിലാണ്. മാധവൻ വൻ ഭൂരിപക്ഷത്തിൽ വിജയിക്കണമെന്ന് ശ്രീജ പറയുമ്പോൾ തിരഞ്ഞെടുപ്പിനെ രാഷ്ട്രീയമായി കാണുന്നുവെന്നാണ് പ്രമീളയുടേയും സുലേഖയുടേയും അഭിപ്രായം .
ഐ.എൻ.ടി.യു.സി സംസ്ഥാന നിർവാഹകസമിതി അംഗവും ഡി.സി.സി നിർവാഹക സമിതി അംഗവുമാണ് എം.ഒ.മാധവൻ. കോൺഗ്രസ് ശ്രീകണ്ഠപുരം ബ്ലോക്ക് പ്രസിഡന്റ് സ്ഥാനവും വഹിച്ചുട്ടുണ്ട്. കോട്ടൂർ എ.യു.പി സ്‌കൂളിൽ നിന്ന് പ്രധാനാദ്ധ്യാപകനായി 2004ൽ വിരമിച്ചു. മലപ്പട്ടം സഹകരണ ബാങ്ക് ജീവനക്കാരിയായ ടി.കെ.സുലേഖ സി.പി.എം ശ്രീകണ്ഠാപുരം ഏരിയ കമ്മിറ്റി അംഗവും മഹിള അസോസിയേഷൻ സംസ്ഥാന കമ്മിറ്റി അംഗവുമാണ്. ശ്രീകണ്ഠാപുരം നഗരസഭയിൽ ആശവർക്കറാണ് എം.ഒ.പ്രമീള. ശ്രീജ പെരുവളത്തുപറമ്പ് അങ്കണവാടി വർക്കറും.