ഡൽഹി സ്‌ഫോടനം, അൽ ഫലായിലെ മുറിയിൽ നിന്ന് 18 ലക്ഷം രൂപ കണ്ടെത്തി

ന്യൂഡൽഹി: ഡൽഹി സ്‌ഫോടനക്കേസ് പ്രതി ഷഹീൻ സയീദ് താമസിച്ചിരുന്ന അൽ ഫലാ സർവകലാശാലയിലെ 22-ാം നമ്പർ മുറിയിൽ നിന്ന് എൻ.ഐ.എ സംഘം 18 ലക്ഷം രൂപ കണ്ടെുടുത്തു. അൽ ഫലാ സർവകലാശാലയിലെ അദ്ധ്യാപികയായിരുന്ന ഷഹീൻ താമസിച്ചിരുന്ന ഹോസ്റ്റൽ മുറിയിൽ നിന്നാണ് അന്വേഷണസംഘം പണം കണ്ടെത്തിയത്. പ്ലാസ്റ്റിക് ബാഗിൽ പൊതിഞ്ഞ് അലമാരയിൽ സൂക്ഷിച്ച നിലയിലാണ് പണം കണ്ടെത്തിയത്. ഷഹീന് എവിടെ നിന്നാണ് പണം ലഭിച്ചതെന്നത് സംബന്ധിച്ച് എൻ.ഐ.എ അന്വേഷണം ആരംഭിച്ചു. ഷഹീനെയും മറ്റു പ്രതികളായ മുസമ്മിൽ ഷക്കീൽ, അദീൽ അഹമ്മദ് റാത്തർ എന്നിവരെയും ഇന്നലെ കോടതിയിൽ ഹാജരാക്കി. കഴിഞ്ഞ ദിവസം എൻ.ഐ.എ ഷഹീനെ അൽ ഫലാ യൂണിവേഴ്‌സിറ്റിയിലെത്തിച്ച് തെളിവെടുപ്പ് നടത്തിയിരുന്നു. താമസിച്ചിരുന്ന മുറിയിലും ക്ലാസ് മുറിയിലും ഓഫീസ് ക്യാബിനിലും തെളിവെടുപ്പ് നടത്തി. ഡൽഹി സ്‌ഫോടനക്കേസ് പ്രതികൾ വിവിധയിടങ്ങളിൽ സ്‌ഫോടനം നടത്താനായി വാങ്ങിയ 32 കാറുകളിലൊന്നായ മാരുതി സുസുകി ബ്രെസ്സ കാർ വാങ്ങിയത് ഷഹീനും മുസമ്മിൽ ഷക്കീലുമാണ്. ഡൽഹിയിലെ ചെങ്കോട്ടയ്ക്ക് സമീപം ചാവേർ കാർബോംബ് സ്‌ഫോടനം നടത്തിയ ഡോ. ഉമർ ഉൻ നബിയും കേസിൽ അറസ്റ്റിലായ ഷഹീൻ,​ മുസമ്മിൽ, അദീൽ അഹമ്മദ് റാത്തർ എന്നിവരും അൽ ഫലാ സർവകലാശാലയിൽ ജോലി ചെയ്തിരുന്നു. നവംബർ 10ന് ചെങ്കോട്ടയ്ക്ക് സമീപം നടന്ന ബോംബ് സ്‌ഫോടനത്തിൽ 15 പേരാണ് കൊല്ലപ്പെട്ടത്.