പൊലീസിന്റെ സമയോചിത ഇടപെടൽ, യാത്രക്കാരന്റെ ജീവൻ രക്ഷിച്ചു

തൊടുപുഴ: പൊലീസുകാരുടെ സമയോചിതമായ ഇടപെടലിൽ കെ.എസ് ആർ.ടി.സി യാത്രക്കാരന്റെ ജീവൻ രക്ഷിച്ചു. കോഴിക്കോട് നിന്നും പത്തനംതിട്ടയ്ക്ക് പോകുകയായിരുന്ന സ്വിഫ്റ്റ് ബസ് ഇന്നലെ വൈകിട്ട് ഏഴേ മുക്കാലിന് തൊടുപുഴയിലെത്തിയപ്പോഴായിരുന്നു സംഭവം. ബസ് സ്റ്റാൻഡിൽ എത്തിയപ്പോൾ മകനൊപ്പം യാത്ര ചെയ്തിരുന്ന പത്തനംതിട്ട സീതത്തോട് സ്വദേശി ഷാജി തോമസിന് (60) നെഞ്ചുവേദന അനുഭവപ്പെടുകയായിരുന്നു. നഗരത്തിലെ ഗതാഗതക്കുരുക്കുമൂലം കെ.എസ് ആർ.ടി.സി ബസിൽ ആശുപത്രിയിൽ എത്തിക്കാനാകുമായിരുന്നില്ല. ഉടനടി ബസ് സ്റ്റാൻഡിൽ ഡ്യൂട്ടിയിലുണ്ടായിരുന്ന ഞാടുപുഴ കൺട്രോൾ റൂം എസ്.ഐ ജമാൽ, സീനിയർ സിവിൽ പൊലീസ് ഓഫീസർ ശിവകുമാർ എന്നിവരുടെ നേതൃത്വത്തിൽ ഷാജിയെ പൊലീസ് വാഹനത്തിൽ നഗരത്തിലെ സ്വകാര്യ ആശുപത്രിയിൽ പ്രവേശിപ്പിച്ചു. യാത്രക്കാരന്റെ നില തൃപ്തികരമാണെന്ന് ആശുപത്രി അധികൃതർ അറിയിച്ചു.