അട്ടമല ഏറാട്ടുകുണ്ടിൽ നിന്നും കാണാതായ  ആദിവാസി കുടുംബത്തെ കണ്ടെത്തി

മേപ്പാടി: അട്ടമല ഏറാട്ടുകുണ്ടിൽ നിന്ന് വനമേഖലയിലേക്ക്‌ പോയ ആദിവാസി കുടുംബത്തെ കണ്ടെത്തി. ഏറാട്ടുകുണ്ട് ഉന്നതിയിലെ കൃഷ്ണൻ, ഭാര്യ ലക്ഷ്മി എന്ന ശാന്ത, ഇളയ ആൺകുട്ടി എന്നിവരെ ആണ് കണ്ടെത്തിയത്. എന്നാൽ ഗർഭിണിയായിരുന്ന ശാന്തയുടെ നവജാത ശിശുവിനെ കണ്ടെത്താനായിട്ടില്ല. കാണാതാകുമ്പോൾ എട്ടുമാസം ഗർഭിണിയായിരുന്നു ശാന്ത. കുഞ്ഞ് മരിച്ചെന്നാണ് നിഗമനം. സൂചിപ്പാറ വെള്ളച്ചാട്ടത്തിന് സമീപത്തായാണ് കുടുംബത്തെ കണ്ടെത്തിയത്. വനം വകുപ്പും പൊലീസും പട്ടികവർഗ്ഗ വകുപ്പും ഇവർക്കായി തിരച്ചിൽ തുടരുകയായിരുന്നു. ഒരാഴ്ച മുൻപാണ് കുടുംബത്തെ കാണാതായത്. നിലമ്പൂർ വനമേഖല കേന്ദ്രീകരിച്ച് ആയിരുന്നു തിരച്ചിൽ നടത്തിവന്നത്. സ്ഥിരമായി വനമേഖലയിൽ പോകുന്ന സംഘമാണിത്. ഗർഭിണിയായതിനെ തുടർന്ന് ആദ്യ മാസങ്ങളിൽ ചികിത്സ ലഭ്യമാക്കിയിരുന്നുവെങ്കിലും പിന്നീട് ചികിത്സ ലഭിച്ചിരുന്നില്ല. ട്രൈബൽ പ്രമോട്ടർ ഉൾപ്പെടെ ശാന്തയെ ആശുപത്രിയിലേക്ക് കൊണ്ടുപോകാൻ എത്തിയപ്പോഴേക്കും കുടുംബത്തെ കാണാതാവുകയായിരുന്നു.