കിണറ്റിൽ അകപ്പെട്ട യുവാവിനെ  രക്ഷപ്പെടുത്തി

വണ്ണപ്പുറം: കാളിയാർ മുള്ളൻകുത്തിയിൽ ഉപയോഗശൂന്യമായ കിണറ്റിൽ അകപ്പെട്ട യുവാവിനെ ഫയർ ഫോഴ്സ് രക്ഷപ്പെടുത്തി. കാഞ്ഞിരത്തിങ്കൽ അലൻ പൈലി (20)യാണ് അപകടത്തിൽപ്പെട്ടത്. ശനിയാഴ്ച രാത്രി 1പതിനൊന്ന് മണിയോടെയായിരുന്നു സംഭവം. വീട്ടിലെ ഉപയോഗശൂന്യമായ കിണറ്റിലാണ് അലൻ അകപ്പെട്ടത്. ഏകദേശം 35 അടി താഴ്ചയും 10 അടിയോളം വെള്ളവും കിണറ്റിൽ ഉണ്ടായിരുന്നു. അപകടത്തിൽപ്പെട്ട ഉടൻ ഓടിക്കൂടിയ നാട്ടുകാർ രക്ഷാപ്രവർത്തനം ആരംഭിച്ചു. ഇവർ ഇട്ടുകൊടുത്ത കയറിലും ഗോവണിയിലും പിടിച്ച് വെള്ളത്തിൽ മുങ്ങാതെ യുവാവ് കിടന്നു. വിവരമറിഞ്ഞ് സ്ഥലത്തെത്തിയ അഗ്നിരക്ഷാസേന, നെറ്റ് ഉപയോഗിച്ച് അലനെ സുരക്ഷിതമായി കരയിലെത്തിച്ചു. തുടർന്ന് മുതലക്കോടത്തെ സ്വകാര്യ ആശുപത്രിയിൽ എത്തിച്ചു. ഫയർഫോഴ്സിന്റെയും നാട്ടുകാരുടെയും കാളിയാർ പൊലീസിന്റെയും സമയോജിതമായ ഇടപെടലാണ് യുവാവിന്റെ ജീവൻ രക്ഷിക്കാൻ സഹായകമായത്. അസിസ്റ്റന്റ് സ്റ്റേഷൻ ഓഫീസർ കെ.എ ജാഫർഖാന്റെ നേതൃത്വത്തിൽ ഫയർ ഓഫീസർമാരായ ഷൗക്കത്തലി ഫവാസ്, ജെയിംസ് പുന്നൻ, ജെയിംസ് നോബിൾ, ടി.കെ വിവേക്, ബി . ആഷിക്, സണ്ണി ജോസഫ്, രാജീവ് ആർ നായർ, ഷാജി പി.ടി, പ്രമോദ് എന്നിവരാണ് രക്ഷാപ്രവർത്തനത്തിൽ പങ്കെടുത്തത്.