ഭാര്യയുടെ മുന്നിലിട്ട് യുവാവിനെ കൊലപ്പെടുത്തിയ പ്രതികൾക്ക് ജീവപര്യന്തം

ആലപ്പുഴ: ഓ​ട്ടോ ഡ്രൈവറായ തലവടി ആനപ്രമ്പാൽ വടക്ക് പുത്തൻപറമ്പ് വീട്ടിൽ അനിൽകുമാറിനെ (38) കൊലപ്പെടുത്തിയ കേസിലെ പ്രതികളെ ജീവപര്യന്തം കഠിനതടവിന് ശിക്ഷിച്ചു. ഒന്നാം പ്രതി ആനപ്രറമ്പാൽ നോർത്ത് കളങ്ങര ഭാഗത്ത് വീട്ടിൽ അമൽ (അപ്പൂസ്​-27), രണ്ടാം പ്രതി ആനപ്രമ്പാൽ നോർത്ത് കളങ്ങര ഭാഗത്ത് കൊച്ചുപറമ്പ് വീട്ടിൽ കെവിൻ (25) എന്നിവരെയാണ്​ ആലപ്പുഴ അഡീഷണൽ സെഷൻസ്​ കോടതി രണ്ട്​ ജഡ്ജി എസ്​. ഭാരതി ശിക്ഷിച്ചത്​. ഇരുവരും ഒ​രുലക്ഷം രൂപ വീതം പിഴയൊടുക്കണം. മൂന്നാംപ്രതി രാഹുലിനെ വെറുതെവിട്ടു.

2019 ജനുവരി 14ന്​ രാത്രി 12.30നാണ്​ കേസിനാസ്​പദമായ സംഭവം. കെവിന്റെ സഹോദരിയെ എടത്വ പച്ചയിലെ സ്വകാര്യ ആശുപത്രിയിൽ നിന്ന്​ തിരികെ ഓട്ടോയിൽ വരുമ്പോൾ വഴിയിൽ ഇറക്കിവിട്ടതിന്റെ വിരോധത്തിൽ വീടിന് സമീപമെത്തി അനിൽകുമാറിനെ വിളിച്ചിറക്കി ഭാര്യയുടെ മുന്നിലിട്ട്​ ആക്രമിച്ച്​ കൊലപ്പെടുത്തുകയായിരുന്നു. അനിൽ കുമാറിന്റെ ഭാര്യ സന്ധ്യയ്ക്കും ഗുരുതര പരിക്കേറ്റിരുന്നു. അമലിന്റെ കൈവശം കരുതിയ മൂർച്ചയേറിയ കത്തികൊണ്ട് അനിൽകുമാറിന്റെ തലയിലും ഇടത് തോളിലും നെഞ്ചിലും ആഴത്തിൽ കുത്തി മുറിവേൽപ്പിച്ചു. രണ്ടാം പ്രതിയായ കെവിനാണ്​ അനിൽകുമാറിനെ പിടിച്ചുനിറുത്തിയത്​.

വിധി കേൾക്കാൻ അനിൽകുമാറിന്റെ അമ്മയും ഭാര്യ സന്ധ്യയും മകനും ഉൾപ്പെടെയുള്ള ബന്ധുക്കൾ എത്തിയിരുന്നു. കൊല്ലാൻ ഉപയോഗിച്ച കത്തിയും വസ്​ത്രങ്ങളും ഒളിപ്പിക്കാൻ സഹായിച്ചതിനാണ്​ രാഹുലിനെ മൂന്നാം പ്രതിയാക്കിയത്​. അഡീഷണൽ പബ്ലിക് പ്രോസിക്യൂട്ടർ എസ്.എ. ശ്രീമോൻ ഹാജരായി.