വീൽചെയറിൽ ബഹിരാകാശത്തേക്ക്, ചരിത്രം കുറിക്കാൻ മിക്കേല

വാഷിംഗ്ടൺ: വീൽചെയറിൽ ബഹിരാകാശത്തെത്തിയ ആദ്യ വ്യക്തിയെന്ന ചരിത്ര നേട്ടം സ്വന്തമാക്കാനുള്ള തയ്യാറെടുപ്പിലാണ് ജർമ്മൻകാരി മിക്കേല ബെന്തോസ് (33). വെസ്റ്റ് ടെക്സസിൽ നിന്ന് ഇന്ന് രാത്രി 7.30ന് (ഇന്ത്യൻ സമയം) വിക്ഷേപിക്കുന്ന ബ്ലൂ ഒറിജിൻ കമ്പനിയുടെ എൻ.എസ്- 37 ബഹിരാകാശ വിനോദ യാത്രാ ദൗത്യത്തിന്റെ ഭാഗമാണ് മിക്കേല.

പേടകം ഭൗമാന്തരീക്ഷത്തെയും ബഹിരാകാശത്തെയും വേർതിരിക്കുന്ന കാർമൻ രേഖ മറികടന്ന് പന്ത്രണ്ട് മിനിറ്റ് കൊണ്ട് സുരക്ഷിതമായി ഭൂമിയിൽ തിരിച്ചെത്തും. 2018ൽ സംഭവിച്ച അപകടത്തിൽ നട്ടെല്ലിനുണ്ടായ ക്ഷതമാണ് എയറോസ്‌പേസ്, മെക്കാട്രോണിക്സ് എൻജിനിയറായ മിക്കേലയുടെ ജീവിതം മാറ്റിമറിച്ചത്. മറ്റ് അഞ്ച് പേരും യാത്രയിൽ മിക്കേലയ്ക്കൊപ്പമുണ്ട്. ആമസോൺ സ്ഥാപകൻ ജെഫ് ബെസോസിന്റെ ഉടമസ്ഥതയിലുള്ള ബ്ലൂ ഒറിജിനിന്റെ ന്യൂ ഷെപ്പേഡ് മിഷനിലെ 37-ാം ദൗത്യമാണിത്.