അപകടഭീഷണിയായി പഞ്ചായത്ത് കിണർ

മുഹമ്മ : നിലം പതിക്കാറായി നിലകൊള്ളുന്ന പഞ്ചായത്ത് കിണർ ഭീഷണിയാകുന്നു. മുഹമ്മ പഞ്ചായത്തിൽ തുരുത്തൻ കവലയ്ക്ക് സമീപം എസ്.എൻ.ഡി.പി യോഗം 527​ാം നമ്പർ ശാഖയുടെ ഗുരുദേവ ക്ഷേത്രത്തിന് മുന്നിലുള്ള കിണറിന്റെ തൂണുകളിലൊന്നാണ് എപ്പോൾ വേണമെങ്കിലും നിലംപതിക്കാവുന്ന അവസ്ഥയിലുള്ളത്. ഗുരുക്ഷേത്രത്തിൽ കുട്ടികളടക്കം നിരവധി പേരാണ് എത്താറുള്ളത്. കിണറിന്റെ തൂൺ ഇവർക്ക് ഭീഷണിയാണ്.

1957​ലെ ആദ്യത്തെ മുഹമ്മ പഞ്ചായത്ത് കമ്മിറ്റിയുടെ നേതൃത്വത്തിൽ നിർമ്മിച്ചതാണ് ഈ കിണർ. പൂർണമായും ചെങ്കല്ലിൽ തീർത്ത കിണറിന് വെള്ളം കോരാനുള്ള കപ്പിയും കയറും സംവിധാനങ്ങളും ഉണ്ടായിരുന്നു. കാലക്രമത്തിൽ കിണർ ഉപയോഗിക്കാതാവുകയായിരുന്നു. കിണറ്റിലേക്ക് വേരുകളിറങ്ങി. ചുറ്റുതറയും പൊട്ടിപ്പൊളിഞ്ഞു കിടക്കുകയാണ്.