ബി.ജെ.പി അജണ്ടയല്ല ഇടതുപക്ഷത്തിന്

നേതാവിനോട്

..................................

ബിനോയ് വിശ്വം

സി.പി.ഐ സംസ്ഥാന സെക്രട്ടറി

തയ്യാറാക്കിയത്:

കെ.പി.സജീവൻ

 മുസ്ലീം-ക്രിസ്ത്യൻ സമുദായത്തിന് ഞങ്ങളെ അറിയാം  പിണറായി നയിക്കണോ എന്ന് ആ പാർട്ടി തീരുമാനിക്കും  ശബരിമലയിൽ കുറ്റപത്രം വരട്ടെ; അപ്പോൾ നടപടി

 വെള്ളാപ്പള്ളി വിഷയത്തിൽ നോ കമന്റ്സ്

ഇടതു സർക്കാരിന്റെ ചുക്കാൻ പിടിക്കുന്നത് സി.പി.എമ്മും പിണറായി വിജയനുമാണെങ്കിലും നിർണായക ഘട്ടങ്ങളിലെല്ലാം തിരുത്തൽ ശക്തിയാവുന്നത് സി.പി.ഐ ആണ്. തെലങ്കാനയിൽ പാർട്ടി പരിപാടിക്കിടെ കേരളത്തിൽ ആസന്നമായ നിയമസഭാ തിരഞ്ഞെടുപ്പിനെക്കുറിച്ച് ബിനോയ് വിശ്വം സംസാരിക്കുന്നു

?​ ജമാഅത്തെ ഇസ്ലാമി ആരോപണം ഒടുവിൽ പാരയാകുമോ

 എന്തു പാര?​ ബാലൻ ഒരു വിമർശനം ഉന്നയിച്ചു. അതിനെക്കുറിച്ച് പല ഭാഗങ്ങളിലും ചർച്ചകളുണ്ടായി. അത്തരം വിവാദങ്ങളെല്ലാം മറികടക്കാൻ കെല്പുള്ള മുന്നണിയാണ് എൽ.ഡി.എഫ്.

?​ സി.പി.എമ്മിന്റെ ആക്ഷേപം അതുപോലെ ഏറ്റെടുത്തിരിക്കുകയാണ് ബി.ജെ.പി. സംസ്ഥാന അധ്യക്ഷനും...

 ബി.ജെ.പിയുടെയോ രാജീവ് ചന്ദ്രശേഖറിന്റെയോ അജണ്ടയല്ല കേരളത്തിലെ ഇടതുപക്ഷത്തിനും സി.പി.ഐയ്ക്കും. അവർ അത് വർഗീയ മുതലെടുപ്പിന് ഉപയോഗിക്കുകയാണ്. ഞങ്ങൾക്ക് വർഗീയതയില്ല. വർഗീയ ശക്തികൾക്കെതിരായ നിരന്തര പോരാട്ടമാണ് എക്കാലവും ഇടതുപക്ഷം നടത്തിവരുന്നത്. അതിൽ ജമാഅത്തെ ഇസ്ലാമിയും പോപ്പുലർ ഫ്രണ്ടും ആർ.എസ്.എസുമെല്ലാം പെടും.

?​ എങ്കിലും ആ പ്രസ്താവന മുസ്ലീം സമുദായത്തിനുള്ളിൽ ആശങ്കയുണ്ടാക്കിയിട്ടില്ലേ...

 വർഗീയ ശക്തികൾക്ക് ആശങ്കയുണ്ടാക്കിയിട്ടുണ്ടാവും. മുസ്ലീം സമുദായത്തിനില്ല. കേരളത്തിലെ മുസ്ലീം-ക്രിസ്തൻ സമുദയത്തിന് പണ്ടുതൊട്ടേ അറിയാവുന്ന പ്രസ്ഥാനമാണ് ഇടതുപക്ഷം. അത് വർഷങ്ങളായുള്ള ബന്ധമാണ്. അതൊന്നും ഇത്തരം വിവാദങ്ങൾകൊണ്ട് തകർക്കാനാവില്ല.

?​ ജയസാദ്ധ്യത വിവാദങ്ങളിൽ മുങ്ങുമോ.

 വെറും സാദ്ധ്യതയല്ല; വിജയം 100 ശതമാനം ഉറപ്പാണ്. മൂന്നാം ഇടത് സർക്കാർതന്നെ കേരളം ഭരിക്കും.

?​ എങ്ങനെയാണ് ഇത്തരത്തിൽ ഒരു ശുഭപ്രതീക്ഷ വയ്ക്കാനാവുന്നത്...

 നിങ്ങൾ പറയുന്ന കുഞ്ഞുകുഞ്ഞ് വിവാദങ്ങളിൽ തളച്ചിടാനാവുന്നതല്ല കേരളത്തിൽ കഴിഞ്ഞ പത്തുവർഷക്കാലം ഇടതുപക്ഷം നടത്തിയ വികസന പ്രവർത്തനങ്ങൾ. വൻകിട പദ്ധതികൾ മുതൽ താഴേത്തട്ടിലുള്ള ജനങ്ങളുടെ ക്ഷേമം വരെ ഭംഗിയായി നടന്നു. പ്രകടന പത്രികയിൽ പറഞ്ഞിട്ട് ഈ സർക്കാർ നടപ്പിലാക്കാതിരിക്കുന്ന ഏതെങ്കിലും പദ്ധതിയുണ്ടോ?​ പത്തുവർഷം മുമ്പത്തെ യു.ഡി.എഫ് സർക്കാരിന്റെ കാലത്തെ കാര്യങ്ങൾ കൃത്യമായി രാഷ്ട്രീയ വിശകലനം നടത്തുന്നവർക്കറിയാം ഇടത് സർക്കാർ ജനങ്ങൾക്കൊപ്പമായിരുന്നെന്ന്. അതുകൊണ്ടാണ് 100 ശതമാനം വിജയമെന്ന് ഉറപ്പ് പറയുന്നത്.

?​ തിരഞ്ഞെടുപ്പിനെ പിണറായി നയിക്കുമെന്നാണ് എം.എ. ബേബിയും പറഞ്ഞത്.

 കേരളത്തിലെ ഇടതുപക്ഷത്തെ നയിക്കുന്ന എറ്റവും വലിയ പാർട്ടി സി.പി.എമ്മാണ്. അവരുടെ സ്വാതന്ത്ര്യമാണ് ആര് നയിക്കണമെന്നത്. അതിൽ സി.പി.ഐക്ക് റോളില്ല.

?​ എസ്.എൻ.ഡി.പി യോഗം ജനറൽ സെക്രട്ടറി വെള്ളപ്പള്ളി നടേശനെക്കുറിച്ചുള്ള പ്രതികരണം അപക്വമായിപ്പോയില്ലേ...

 നോ കമന്റ്‌സ്. ഇപ്പോൾ അതിനുള്ള സമയമല്ല.

?​ സി.പി.ഐ കൂടുതൽ സീറ്റ് ചോദിക്കുന്നുണ്ടോ.

 അത്തരം ചർച്ചകളിലേക്കൊന്നും കടന്നിട്ടില്ല. ഇപ്പോൾ തിരഞ്ഞെടുപ്പിനുള്ള മുന്നൊരുക്കമാണ്. സീറ്റ് വീതംവയ്പ്പൊക്കെ പിന്നീട്.

?​ ശബരിമല വിഷയത്തിൽ സി.പി.എമ്മിന്റെ നിലപാടിലാണല്ലോ സി.പി.ഐയും. ജയിലിലായ നേതാക്കളെ പുറത്താക്കാത്തത് തിരിച്ചടിയാവില്ലേ.

 അങ്ങനെ രണ്ടു പാർട്ടിക്കും ഒരേ നിലപാടില്ല. അവരെടുത്ത നിലപാട് അവർ പറഞ്ഞിട്ടുണ്ട്. പിന്നെ കെ.പി.ശങ്കരദാസ് കടുത്ത രോഗ ബാധിതനാണ്. അദ്ദേഹം അത്തരമൊരു കൃത്യത്തിൽ പങ്കാളിയാണെന്ന് വിശ്വസിക്കുന്നില്ല. പക്ഷെ വിശ്വാസത്തേക്കാൾ പ്രധാനമാണ് അന്വേഷണവും അവരുടെ കണ്ടെത്തലുകളും. കുറ്റപത്രം വരട്ടെ; അപ്പോൾ കാണാം. കുറ്റം ചെയ്തിട്ടുണ്ടെങ്കിൽ ഒരു നേതാവിനേയും സംരക്ഷിക്കാൻ സി.പി.ഐ ഇല്ല. നിയമം നിയമത്തിന്റെ വഴി പോകട്ടെ.