അധികാരത്തിലെത്തിയാൽ കമിതാക്കൾക്ക് സൗജന്യ ബസ് യാത്ര, പ്രഖ്യാപനവുമായി മുൻ മന്ത്രി

ചെന്നൈ: വരുന്ന നിയമസഭാ തിരഞ്ഞെടുപ്പിൽ തമിഴ്‌നാട്ടിൽ തങ്ങൾ അധികാരത്തിലെത്തിയാൽ സർക്കാർ ബസുകളിൽ കമിതാക്കൾക്ക് സൗജന്യയാത്ര അനുവദിക്കുന്നമെന്ന് അണ്ണാ ഡി എം കെ നേതാവും മുൻ മന്ത്രിയുമായ കെ ടി രാജേന്ദ്ര ബാലാജി. പുരുഷന്മാർക്ക് സൗജന്യ ബസ് യാത്രയെന്ന പാർട്ടിയുടെ തിരഞ്ഞെടുപ്പ് വാഗ്ദാനത്തെക്കുറിച്ച് സംസാരിക്കവെയായിരുന്നു രാജേന്ദ്ര ബാലാജി പുതിയ സൗജന്യത്തെക്കുറിച്ച് പറഞ്ഞത്.

പുരുഷന്മാർക്ക് ബസുകളിൽ സൗജന്യയാത്ര നിലവിൽ വരുന്നതോടെ ഭർത്താക്കന്മാർക്ക് ഭാര്യമോരോടൊത്തും യുവാക്കൾക്ക് കാമുകിമാരോടൊപ്പവും സൗജന്യയാത്രചെയ്യാൻ കഴിയുമെന്നാണ് അദ്ദേഹത്തിന്റെ വിശദീകരണം. സ്ത്രീകൾക്കുമാത്രം സൗജന്യയാത്ര അനുവദിച്ചതിലൂടെ ഡിഎംകെ കുടുംബങ്ങളെ വിഭജിച്ചെന്നും അദ്ദേഹം ആരോപിച്ചു. സ്ത്രീകൾ സൗജന്യമായി യാത്രചെയ്യുമ്പോൾ പുരുഷന്മാർ പണംകൊടുത്ത് മറ്റുബസുകളിൽ പോകേണ്ട അവസ്ഥയാണെന്നും ബാലാജി പറഞ്ഞു.

തിരഞ്ഞെടുപ്പ് അടുത്തതോടെ അഞ്ച് പ്രധാന വാഗ്ദാനങ്ങളാണ് അണ്ണാ ഡി എം കെ നൽകിയിരിക്കുന്നത്. ഓരോ റേഷൻകാർഡ് ഉടമകൾക്കും മാസം 2000 രൂപ വീതം അക്കൗണ്ടിൽ നൽകും, സിറ്റി ബസുകളിൽ പുരുഷന്മാർക്കും സൗജന്യയാത്ര, സ്വന്തമായി വീടില്ലാത്തവർക്ക് കോൺക്രീറ്റ് വീടുകൾ, ഗ്രാമീണ തൊഴിൽ ദിനങ്ങൾ 150 ദിവസമാക്കും, അഞ്ചുലക്ഷം സ്ത്രീകൾക്ക് സ്കൂട്ടർ വാങ്ങാൻ 25,000 രൂപ സബ്സിഡി തുടങ്ങിയ വാഗ്ദാനങ്ങളാണ് നൽകിയത്.

ഒരുമുഴം നേരത്തേ തിരഞ്ഞെടുപ്പ് ഒരുക്കങ്ങൾ തുടങ്ങിയെങ്കിലും സംസ്ഥാനത്ത് അണ്ണാ ഡി എം കെയുടെ നില ആശാവഹമല്ല എന്നാണ് റിപ്പോർട്ട്. ഡി എം കെ തുടർഭരണത്തിനുവേണ്ടി കച്ചമുറുക്കി രംഗത്തുണ്ട്. നടൻ വിജയ‌്‌യുടെ പാർട്ടി ശക്തമായ വെല്ലുവിളി ഉയർത്തും എന്നാണ് കരുതുന്നത്.