ഓരോ ശ്വാസത്തിലും ഒളിഞ്ഞിരിക്കുന്ന അപകടം

ഇന്നത്തെ ലോകത്ത് ശുദ്ധമായ വായു ശ്വസിക്കുക എന്നത് പല നഗരങ്ങളിലും ഒരു ആഡംബരമായി മാറിക്കൊണ്ടിരിക്കുകയാണ്. വാഹനങ്ങളുടെ പുക, വ്യവസായ ചിമ്മിനികളില്‍ നിന്നുള്ള വിഷവാതകങ്ങള്‍, നിര്‍മ്മാണ പ്രവര്‍ത്തനങ്ങളില്‍ നിന്നുള്ള പൊടി, വീടിനുള്ളിലെ പാചകപ്പുക - ഇവയെല്ലാം ചേര്‍ന്ന് നാം ദിവസേന ശ്വസിക്കുന്ന വായുവിനെ പതിയെ വിഷമാക്കുന്നു. വായു മലിനീകരണം ശബ്ദമില്ലാതെ നമ്മുടെ ശരീരത്തിലേക്ക് കടന്ന് ദീര്‍ഘകാല രോഗങ്ങള്‍ സൃഷ്ടിക്കുന്നതിനാല്‍ ഇതിനെ ഒരു “മൗന കൊലയാളി” എന്ന് വിളിക്കുന്നത് അതിശയോക്തിയല്ല.

ലോകാരോഗ്യ സംഘടനയുടെ (WHO) കണക്കുകള്‍ പ്രകാരം, ലോകത്തെ 99% ജനങ്ങളും ആരോഗ്യത്തിന് ഹാനികരമായ വായുവാണ് ശ്വസിക്കുന്നത്. ഇന്ത്യയില്‍ മാത്രം പ്രതിവര്‍ഷം ഏകദേശം 16-18 ലക്ഷം അകാല മരണങ്ങള്‍ വായു മലിനീകരണവുമായി ബന്ധപ്പെടുത്തി റിപ്പോര്‍ട്ട് ചെയ്യപ്പെടുന്നു.

ഇന്ത്യ: മലിനവായുവിന്റെ ആഗോള ഹോട്ട്സ്പോട്ട്

വേഗത്തിലുള്ള നഗരവല്‍ക്കരണവും ജനസംഖ്യാവര്‍ദ്ധനവും ഇന്ത്യയെ വായു മലിനീകരണത്തിന്റെ പ്രധാന കേന്ദ്രങ്ങളിലൊന്നാക്കി മാറ്റിയിട്ടുണ്ട്. ലോകത്തിലെ ഏറ്റവും മലിനമായ നഗരങ്ങളുടെ പട്ടികയില്‍ വര്‍ഷങ്ങളായി ഇന്ത്യന്‍ നഗരങ്ങള്‍ ഇടം പിടിച്ചുവരുന്നു.

PM2.5 എന്ന സൂക്ഷ്മകണങ്ങളുടെ ശരാശരി വാര്‍ഷിക അളവ് പല ഇന്ത്യന്‍ നഗരങ്ങളിലും WHO നിശ്ചയിച്ച സുരക്ഷാ പരിധിയേക്കാള്‍ 5-10 മടങ്ങ് കൂടുതലാണ്.

ഡല്‍ഹി, ലക്‌നൗ, കാന്‍പൂര്‍, പട്ന തുടങ്ങിയ നഗരങ്ങളില്‍ ശീതകാലത്ത് “വായു അടിയന്തരാവസ്ഥ” പതിവാണ്.

വാഹനങ്ങളില്‍ നിന്നുള്ള എമിഷൻ, കല്‍ക്കരി അധിഷ്ഠിത വൈദ്യുത നിലയങ്ങള്‍, വിള അവശിഷ്ടങ്ങള്‍ കത്തിക്കല്‍ എന്നിവയാണ് പ്രധാന കാരണങ്ങള്‍

വായു മലിനീകരണം ഇന്ത്യയില്‍ ഏറ്റവും കൂടുതല്‍ ബാധിക്കുന്നത്

കുട്ടികളെ

പ്രായമായവരെ

ശ്വാസകോശവും ഹൃദ്രോഗവും ഉള്ളവരെ

താഴ്ന്ന സാമ്പത്തിക നിലയിലുള്ളവരെ

കേരളം: 'പച്ച സംസ്ഥാനത്തിനും' ശുദ്ധവായുവില്ലേ?

“ഗോഡ്സ് ഓണ്‍ കണ്‍ട്രി” എന്നറിയപ്പെടുന്ന കേരളം വായു മലിനീകരണത്തില്‍ നിന്ന് പൂര്‍ണ്ണമായും രക്ഷപ്പെട്ടിട്ടുണ്ടോ? ഉത്തരം - ഇല്ല.

സത്യത്തില്‍, ഉത്തരേന്ത്യയുമായി താരതമ്യം ചെയ്യുമ്പോള്‍ കേരളത്തിലെ വായു ഗുണനിലവാരം മെച്ചപ്പെട്ടതാണ്. എന്നിരുന്നാലും, നഗരവല്‍ക്കരണം, വാഹന വര്‍ധന, നിര്‍മ്മാണ പ്രവര്‍ത്തനങ്ങള്‍, മാലിന്യങ്ങള്‍ കത്തിക്കല്‍ എന്നിവ കേരളത്തിലും വായു മലിനീകരണം വര്‍ദ്ധിപ്പിക്കുന്നു.

കേരളത്തിലെ ശ്രദ്ധേയമായ വസ്തുതകള്‍

കൊച്ചി, തിരുവനന്തപുരം, കോഴിക്കോട് തുടങ്ങിയ നഗരങ്ങളില്‍ PM2.5, PM10 എന്നീ രീതിയില്‍ പല ദിവസങ്ങളിലും സുരക്ഷാ പരിധി കടക്കുന്നു.

കേരളത്തില്‍ രജിസ്റ്റര്‍ ചെയ്യുന്ന വാഹനങ്ങളുടെ എണ്ണം ഓരോ വര്‍ഷവും ഗണ്യമായി വര്‍ദ്ധിക്കുന്നു.

നഗര നിര്‍മ്മാണ മേഖലയില്‍ നിന്നുള്ള പൊടിയും റോഡില്‍ നിന്നുള്ള പോടിയും പ്രധാന മലിനീകരണ ഘടകങ്ങളാണ്.

വീടുകളില്‍ പാചകത്തിനായി എല്‍പിജി വ്യാപകമായെങ്കിലും, ചില ഗ്രാമപ്രദേശങ്ങളില്‍ ഇപ്പോഴും വിറക് ഉപയോഗം തുടരുന്നു

ശ്വാസകോശ രോഗങ്ങള്‍, പ്രത്യേകിച്ച് ആസ്ത്മയും COPDയും, കേരളത്തില്‍ ഉയര്‍ന്നുവരുന്ന പ്രവണതയാണ്. വായു മലിനീകരണം ഇതില്‍ നിര്‍ണ്ണായക പങ്കുവഹിക്കുന്നതായി ആരോഗ്യ വിദഗ്ധര്‍ ചൂണ്ടിക്കാട്ടുന്നു.

വീടിനുള്ളിലെ വായു: കാണാത്ത അപകടം

പുറംവായുവിനേക്കാള്‍ അപകടകരമായിരിക്കാം വീടിനുള്ളിലെ വായു. അടുക്കളയിലെ പുക, കൊതുകുതിരി, ധൂപം, പുകവലി - ഇവയെല്ലാം വീടിനുള്ളില്‍ വിഷവായു സൃഷ്ടിക്കുന്നു.

ഇന്ത്യയില്‍

ഗ്രാമീണ മേഖലയിലെ സ്ത്രീകളും കുട്ടികളും വീടിനുള്ളിലെ വായു മലിനീകരണം (Indoor Air Pollution) മൂലം രോഗബാധിതരാകുന്ന നിരക്കില്‍ വര്‍ദ്ധനവ്. WHO കണക്കുകള്‍ പ്രകാരം, വീടിനുള്ളിലെ വായു മലിനീകരണം മൂലം ഇന്ത്യയില്‍ പ്രതിവര്‍ഷം ലക്ഷക്കണക്കിന് മരണങ്ങള്‍ സംഭവിക്കുന്നു.കേരളത്തില്‍ ഈ പ്രശ്‌നം കുറവാണെങ്കിലും, പൂര്‍ണ്ണമായി ഇല്ലാതായിട്ടില്ല.

ശരീരത്തിലേക്കുള്ള ആക്രമണം: വായു മലിനീകരണവും ആരോഗ്യവും

വായു മലിനീകരണം ശ്വാസകോശത്തെ മാത്രമല്ല, ശരീരത്തെ മുഴുവന്‍ പ്രതികൂലമായി ബാധിക്കുന്നു.

ശ്വാസകോശ രോഗങ്ങള്‍

ആസ്ത്മ ക്രോണിക് ഒബ്‌സ്ട്രക്ടീവ് പള്‍മണറി ഡിസീസ് (COPD) ആവര്‍ത്തിച്ചുള്ള ശ്വാസകോശ അണുബാധ ശ്വാസകോശ കാന്‍സര്‍

ഹൃദ്രോഗങ്ങളും മസ്തിഷ്‌ക പ്രശ്‌നങ്ങളും

ഹൃദയാഘാതം പക്ഷാഘാതം (Stroke) ഉയര്‍ന്ന രക്തസമ്മര്‍ദ്ദം ഓര്‍മ്മശക്തി കുറയല്‍

കുട്ടികളില്‍ വായു മലിനീകരണം ശ്വാസകോശ വളര്‍ച്ചയെ തടസ്സപ്പെടുത്തുകയും പഠനക്ഷമതയെ പ്രതികൂലമായി ബാധിക്കുകയും ചെയ്യുന്നു.

പരിസ്ഥിതിയും കാലാവസ്ഥയും: ഇരട്ടി ഭീഷണി

വായു മലിനീകരണവും കാലാവസ്ഥാ വ്യതിയാനവും കൈകോര്‍ക്കുന്ന പ്രശ്‌നങ്ങളാണ്. ഹരിതഗൃഹ വാതകങ്ങള്‍ ആഗോള താപനില ഉയര്‍ത്തുന്നു. ഇതിന്റെ ഫലമായി അസാധാരണ മഴ,കടുത്ത ചൂട് തരംഗങ്ങള്‍,പ്രളയം,വരള്‍ച്ച തുടങ്ങിയ അത്യാഹിതങ്ങള്‍ ഉണ്ടാവുന്നു. കേരളം അനുഭവിക്കുന്ന കാലാവസ്ഥാ വ്യതിയാനങ്ങളുടെ പിന്നിലും വായു മലിനീകരണത്തിന് പങ്കുണ്ടെന്നത് നിഷേധിക്കാനാവില്ല.

നമുക്ക് എന്ത് ചെയ്യാം?

വായു മലിനീകരണം സര്‍ക്കാരിന്റെ മാത്രം ഉത്തരവാദിത്തമല്ല. ഓരോ പൗരനും ചെയ്യാവുന്ന ചെറിയ മാറ്റങ്ങള്‍ വലിയ ഫലങ്ങള്‍ സൃഷ്ടിക്കും.

അനാവശ്യ വാഹന ഉപയോഗം ഒഴിവാക്കുക

പൊതുഗതാഗതവും കാര്‍പൂളിംഗും പ്രോത്സാഹിപ്പിക്കുക

മാലിന്യങ്ങള്‍ കത്തിക്കാതിരിക്കുക

വീടുകളില്‍ നല്ല വായുസഞ്ചാരം ഉറപ്പാക്കുക

പുകവലി ഒഴിവാക്കുക

സാമൂഹിക-സര്‍ക്കാര്‍ തലത്തില്‍

കര്‍ശനമായ മലിനീകരണ നിയന്ത്രണ നിയമങ്ങള്‍

ശുദ്ധ ഊര്‍ജ്ജ സ്രോതസ്സുകളിലേക്ക് മാറല്‍

നഗരങ്ങളില്‍ കൂടുതല്‍ ഹരിത മേഖലകള്‍

പൊതുജന ബോധവത്കരണം

ശുദ്ധവായു - നമ്മുടെ അവകാശം

വായു മലിനീകരണം ഒരു ദൂരെയുള്ള പ്രശ്‌നമല്ല; അത് നമ്മള്‍ ശ്വസിക്കുന്ന ഓരോ ശ്വാസത്തിലും ഒളിഞ്ഞിരിക്കുന്നു. ഇന്ത്യയിലും കേരളത്തിലും ഈ പ്രശ്‌നം ഇപ്പോഴും നിയന്ത്രിക്കാവുന്ന ഘട്ടത്തിലാണ്. എന്നാല്‍ വൈകിയാല്‍ അതിന്റെ വില നമ്മുടെ ആരോഗ്യവും ഭാവി തലമുറകളുടെ സുരക്ഷയും ആയിരിക്കും.

ശുദ്ധവായു ഒരു സൗജന്യ വിഭവമല്ല - അത് സംരക്ഷിക്കപ്പെടേണ്ട ഒരു മനുഷ്യാവകാശമാണ്. ഇന്ന് നാം എടുക്കുന്ന തീരുമാനങ്ങളാണ് നാളെയുടെ ശ്വാസത്തിന്റെ ഗുണനിലവാരം നിശ്ചയിക്കുന്നത്.

Dr. Ann Mary Jacob Consultant Pulmonologist SUT Hospital, Pattom