14കാരൻ ഓടിച്ച കാർ മറിഞ്ഞ് അപകടം: അമ്മയ്ക്ക് പൊലീസ് നോട്ടീസ്

നേമം: പതിനാലുകാരൻ ഓടിച്ച കാർ അപകടത്തിൽപ്പെട്ട സംഭവത്തിൽ,​കാർ ഉടമയായ അമ്മയോട് സ്റ്റേഷനിൽ ഹാജരാകാൻ നോട്ടീസ് നൽകി പൊലീസ്.കഴിഞ്ഞ ദിവസം അർദ്ധരാത്രിയിൽ മാതാപിതാക്കളെ വീട്ടിൽ പൂട്ടിയിട്ട ശേഷം,​പട്ടം കേന്ദ്രിയ വിദ്യാലയത്തിലെ ഒൻപതാം ക്ലാസ് വിദ്യാർത്ഥിയും സുഹൃത്തുമാണ് കാറിൽ കറങ്ങാനിറങ്ങി അപകടത്തിൽപ്പെട്ടത്.

പ്രായപൂർത്തിയാകാത്തയാൾ വാഹനം ഓടിച്ചാൽ, പുതിയ നിയമപ്രകാരം കാർ ഉടമയ്ക്കെതിരെ കേസെടുക്കും.അതിനാലാണ് വാഹനയുടമയായ കുട്ടിയുടെ അമ്മയുടെ പേരിൽ കേസെടുത്തിരിക്കുന്നത്. ഏഴ് വർഷത്തിൽ കുറയാത്ത ശിക്ഷയുള്ളതിനാൽ നോട്ടീസ് നൽകി വിളിപ്പിക്കണമെന്നാണ് നിയമം.അത് അനുസരിച്ചാണ് നോട്ടീസ് നൽകിയത്.അറസ്റ്റ് സ്റ്റേ ചെയ്ത് സ്റ്റേഷൻ ജാമ്യം നൽകുമെന്ന് കരമന എസ്‌.എച്ച്.ഒ അനൂപ് അറിയിച്ചു.