മാദ്ധ്യമ പ്രവർത്തകൻ എച്ച്.കെ. ദുവ അന്തരിച്ചു

ന്യൂഡൽഹി: മുതിർന്ന പത്രപ്രവർത്തകനും മുൻ രാജ്യസഭാ എം.പിയും മുൻ പ്രധാനമന്ത്രിമാരായ എച്ച്.ഡി. ദേവഗൗഡ,അടൽ ബിഹാരി വാജ്‌പേയി എന്നിവരുടെ മാദ്ധ്യമ ഉപദേഷ്ടാവുമായിരുന്ന ഹരി കൃഷ്‌ണ ദുവ (88) അന്തരിച്ചു. 2008ൽ രാജ്യം പദ്മഭൂഷൺ നൽകി ആദരിച്ചിരുന്നു. സംസ്‌കാരം ഇന്ന് ഉച്ചയ്ക്ക് 12ന് ലോധി റോഡ് ശ്മശാനത്തിൽ.

ദി ഇന്ത്യൻ എക്‌സ്‌പ്രസ്,ടൈംസ് ഒഫ് ഇന്ത്യ,ഹിന്ദുസ്ഥാൻ ടൈംസ് അടക്കം ദേശീയ മാദ്ധ്യമങ്ങളിൽ പ്രവർത്തിച്ച ദുവ ദി ട്രിബ്യൂണിന്റെ മുൻ ചീഫ് എഡിറ്ററാണ്. 2009ൽ മൻമോഹൻസിംഗ് സർക്കാർ രാജ്യസഭയിലേക്ക് നോമിനേറ്റ് ചെയ്‌തു. യു.പി.എ സർക്കാരിന്റെ കാലത്ത് ദേശീയ സുരക്ഷാ കൗൺസിൽ അംഗമായി. 2001-2003 കാലത്ത് ഡെൻമാർക്കിലെ ഇന്ത്യൻ അംബാസഡറായും പ്രവർത്തിച്ചു.